រដ្ឋាភិបាលស្តាំនិយមរបស់អ៊ីស្រាអែល បានរក្សាភាពស្ងៀមស្ងាត់ខាងការទូត នៅសប្តាហ៍នេះ នៅពេលដែលប្រធានាធិបតីអាមេរិក លោក Donald Trump បានចេញនូវសេចក្តីប្រកាសភ្លាមៗជាច្រើន ដែលបានធ្វើឲ្យរង្គើដល់ការជឿជាក់របស់អ៊ីស្រាអែល អំពីជំហររបស់ប្រទេសរបស់ពួកគេ ជាមួយនឹងសម្ព័ន្ធមិត្តដ៏សំខាន់បំផុតរបស់ខ្លួន។

ការសម្រេចចិត្តរបស់លោក Trump ក្នុងការរំលងអ៊ីស្រាអែល អំឡុងដំណើរទស្សនកិច្ចពេលនេះរបស់លោក នៅតំបន់មជ្ឈិមបូព៌ា ត្រូវបានគេមើលឃើញរួចហើយថា ជាសញ្ញាបង្ហាញពីការបង្កើនការយកចិត្តទុកដាក់របស់រដ្ឋបាលលោក ចំពោះកិច្ចព្រមព្រៀងអាជីវកម្មដដ៏កាក់កបជាមួយបណ្តាប្រទេសអ្នកមានឈូងសមុទ្រ ក្នុងនោះរួមទាំងកាតា ដែលមន្ត្រីអ៊ីស្រាអែលបានចោទប្រកាន់ជាយូរមកហើយថា បានជួយគាំទ្រក្រុមហាម៉ាស។

សូម្បីតែនៅមុនពេលដំណើរទស្សនកិច្ចនេះបានចាប់ផ្តើម ក៏អ៊ីស្រាអែលត្រូវបានធ្វើឲ្យមានក្ដីបារម្ភរួចហើយ ដោយសារកិច្ចពិភាក្សារបស់សហរដ្ឋអាមេរិកជាមួយអ៊ីរ៉ង់ ដែលជាសត្រូវរបស់ខ្លួន និងជុំវិញការសម្រេចចិត្តរបស់លោក Trump ក្នុងការបញ្ឈប់វិធានការទម្លាក់គ្រាប់បែកលើក្រុមហ៊ួទី ក្នុងប្រទេសយេម៉ែន ដោយមិនគិតដល់ការប្តេជ្ញាចិត្តរបស់ក្រុមគាំទ្រដោយអ៊ីរ៉ង់មួយនេះ ក្នុងការបន្តការវាយប្រហារដោយមីស៊ីល លើអ៊ីស្រាអែល។

ហើយបន្ទាប់មក មន្ត្រីអ៊ីស្រាអែលគ្មានជម្រើសអ្វី ក្រៅពីបង្ខំចិត្តឈរមើល ខណៈដសហរដ្ឋអាមេរិកបានចរចា រហូតដល់ឈានដល់កិច្ចព្រមព្រៀងជាមួយក្រុមសកម្មប្រយុទ្ធហាម៉ាសប៉ាឡេស្ទីន ដើម្បីនាំយកលោក Edan Alexander ត្រលប់មកផ្ទះវិញ ដែលជាចំណាប់ថ្នូរអាមេរិកចុងក្រោយនៅរស់រានមានជីវិត នៅតំបន់ហ្កាហ្សា។

ចាប់តាំងពីពេលនោះមក ពួកគេត្រូវបង្ខំចិត្តស្ដាប់នូវអ្វីដែលលោក Trump បានប្រកាស ដូចជាការបញ្ចប់ការដាក់ទណ្ឌកម្មលើប្រទេសស៊ីរី និងការអំពាវនាវឲ្យមានប្រក្រតីភាពទំនាក់ទំនងជាមួយរដ្ឋាភិបាលថ្មី នៅក្នុងទីក្រុងដាម៉ាស ដែលអ៊ីស្រាអែលចាត់ទុកថា ជារបបសកម្មប្រយុទ្ធលាក់កំបាំង។ តែទោះជាយ៉ាងក្ដី នាយករដ្ឋមន្ត្រីអ៊ីស្រាអែល លោក Benjamin Netanyahu រហូតមកដល់ពេលនេះ មិនបានធ្វើអត្ថាធិប្បាយអ្វីទាំងអស់ ក្រៅតែពីអរគុណលោក Trump ដែលបានជួយឲ្យមានការដោះលែង លោក Alexander៕