នៅពេលដែលប្រធានាធិបតីរុស្ស៊ី លោក Vladimir Putin ស្វះស្វែងរកដំណោះស្រាយសន្តិភាពដ៏មានសក្តានុពលមួយដើម្បីបញ្ចប់សង្រ្គាមនៅអ៊ុយក្រែន ក្រុមជាតិនិយមដែលប្រកាន់ជំហរតឹងប្រឆាំងលោកខាងលិច នៅក្នុងប្រទេសរុស្ស៊ី កំពុងធ្វើយុទ្ធនាការដើម្បីឱ្យទីក្រុងមូស្គូ នៅតែបន្តប្រយុទ្ធ។

សកម្មជនគាំទ្រទីក្រុងមូស្គូ ឈ្មោះ Pavel Gubarev ដែលរស់នៅក្នុងផ្នែកមួយនៃតំបន់ Donetsk ភាគខាងកើតអ៊ុយក្រែន ដែលរុស្ស៊ីគ្រប់គ្រង បាននិយាយកាលពីថ្ងៃអាទិត្យចុងសប្ដាហ៍មុនថា "ប្រសិនរុស្ស៊ីដាក់អាវុធចុះ នោះស្មើនឹងការចុះចាញ់របស់ប្រទេសទាំងមូល!" ដោយបង្ហាញការប្រឆាំងយ៉ាងខ្លាំងក្លាទល់នឹងក្ដីរំពឹង "បង្កកជម្លោះ" នៅតាមជួរមុខបច្ចុប្បន្ន។

ក្រុមអ្នកវិភាគនិយាយថា ក្នុងពេលដែលប្រធានាធិបតីអាមេរិក Donald Trump និងមេដឹកនាំអឺរ៉ុបខាងលិចមួយចំនួនជំរុញឱ្យមានកិច្ចព្រមព្រៀងសន្តិភាព ក្រុមអ្នកស្នេហាជាតិរុស្ស៊ីទាំងនេះកំពុងជំរុញឱ្យបន្តសង្រ្គាម ដោយបំផុសទឹកចិត្តសាធារណៈជន និងបង្កើតការរំពឹងទុកនៃយុទ្ធនាការសមរភូមិ ដែលមានមហិច្ឆតាធំជាងនេះ។

អ្នកវិភាគបន្តថា អ្នកស្នេហាជាតិទាំងនោះមានប្រយោជន៍ចំពោះវិមានក្រឹមឡាំង ដោយជួយបង្កើត និងរក្សាការគាំទ្រសាធារណៈយ៉ាងទូលំទូលាយសម្រាប់សង្គ្រាមសម្រាប់រយៈពេល ៣ឆ្នាំចុងក្រោយនេះ។ ប៉ុន្តែប្រភពនិយាយថា ក្រុមអ្នកស្នេហាជាតិរុស្ស៊ី ដែលបង្កើតភាពច្របូកច្របល់ខ្លាំងពេកអំពីកិច្ចព្រមព្រៀងសន្តិភាព ចុងក្រោយនឹងត្រូវរងហានិភ័យនៃការជម្រះចេញដើម្បីកុំឱ្យក្លាយជាឧបសគ្គ៕