ប្រជាជននៅប្រទេសម៉ិកស៊ិក បានចេញធ្វើបាតុកម្មក្នុងរដ្ឋធានី កាលពីថ្ងៃព្រហស្បតិ៍ ទី១៥ ខែឧសភា ដើម្បីរំលឹកដល់ទិវាគ្រូបង្រៀន ដោយតវ៉ាទៅនឹងច្បាប់ដ៏ចម្រូងចម្រាសដែលអ្នកជំនាញអះអាងថាបានរារាំងដល់លក្ខខណ្ឌការងាររបស់ពួកគេ។ គ្រូបង្រៀនរាប់រយនាក់ មកពីតំបន់ផ្សេងៗគ្នារបស់ប្រទេស បានមកប្រមូលផ្តុំគ្នានៅលើផ្លូវ Reforma Avenue ដោយដើរដង្ហែទៅកាន់វិមានប្រធានាធិបតី។

បាតុកម្មនេះត្រូវបានរៀបចំឡើងដោយសហជីពបុគ្គលិករអប់រំសាធារណៈ។

គ្រូបង្រៀន កំពុងទាមទារឱ្យលុបចោលច្បាប់ឆ្នាំ២០០៧ ដែលបានធ្វើឱ្យលក្ខខណ្ឌចូលនិវត្តន៍របស់ពួកគេកាន់តែយ៉ាប់យ៉ឺនដោយបង្កើនអាយុចូលនិវត្តន៍ស្របច្បាប់ពី៥៨ឆ្នាំ រហូតដល់៦៥ឆ្នាំ សម្រាប់បុរសដែលបានបំពេញការងាររយៈពេល៣០ឆ្នាំ និងសម្រាប់ស្ត្រីរយៈពេល២៨ឆ្នាំ។

ប្រធានាធិបតី លោកស្រី Claudia Sheinbaum បានប្រកាសកាលពីថ្ងៃព្រហស្បតិ៍ថា ការដំឡើងប្រាក់ឈ្នួល ៩% ចូលជាធរមានពីខែមករា ឆ្នាំ ២០២៥ ជាមួយនឹងការដំឡើង១% បន្ថែមទៀត ដោយចាប់ផ្តើមនៅក្នុងខែកញ្ញា។ លោកស្រី ក៏បានសន្យាថានឹងមានវិស្សមកាលបន្ថែមមួយសប្តាហ៍សម្រាប់គ្រូបង្រៀន។

យោងតាមទិន្នន័យរបស់រដ្ឋាភិបាលបានឲ្យដឹងថា គ្រូបង្រៀនថ្នាក់បឋមទទួលបានប្រាក់ខែជាមធ្យម ៧.៨៩០ ប៉េសូ (ប្រហែល៤០៤ដុល្លារ) និងធ្វើការជាមធ្យម២១,៩ ម៉ោងក្នុងមួយសប្តាហ៍។