ក្រសួងការពារជាតិរុស្ស៊ី បាននិយាយកាលពីថ្ងៃព្រហស្បតិ៍ (១៥ ឧសភា) ថា កងកម្លាំងរបស់ខ្លួនបានដណ្តើមយកទីតាំងឈរជើងចំនួនពីរកន្លែងបន្ថែមទៀត នៅក្នុងការវាយរុញរបស់ពួកគេឆ្លងកាត់ភាគខាងកើតអ៊ុយក្រែន ប៉ុន្តែទីក្រុងគីវ មិនបានទទួលស្គាល់ការបាត់បង់បែបនេះទេ ហើយប្រមុខបញ្ជាការអ៊ុយក្រែន និយាយថា ការប្រយុទ្ធបានអូសបន្លាយលើទូទាំងជួរមុខជាង ១.១០០គីឡូម៉ែត្រ។

សង្រ្គាមបានបន្តអូសបន្លាយ ខណៈកិច្ចចរចាដោយផ្ទាល់រវាងអ្នកចរចាអ៊ុយក្រែន និងរុស្ស៊ី ទំនងជានឹងចាប់ផ្តើមនៅក្នុងប្រទេសទួរគី។ កិច្ចពិភាក្សានេះនឹងជាជំនួបដោយផ្ទាល់លើកដំបូងរវាងភាគីទាំងពីរ ចាប់តាំងពីខែមីនា ឆ្នាំ២០២២មក ប៉ុន្តែក្តីសង្ឃឹមនៃការទម្លាយភាពទាល់ច្រកហាក់ស្រអាប់ ខណៈមេដឹកនាំវិមានក្រឹមឡាំង លោក Vladimir Putin អវត្តមាន។

សេចក្តីថ្លែងការណ៍របស់ក្រសួងការពារជាតិរុស្ស៊ី និយាយថា កងកម្លាំងទីក្រុងមូស្គូ បានដណ្តើមយកភូមិ Novooleksandrivka នៅជិតមជ្ឈមណ្ឌលភស្តុភារ Pokrovsk ដែលទីក្រុងមូស្គូ បានកំណត់គោលដៅអស់ច្រើនខែមកហើយ។ ក្រសួងបន្តថា កងកម្លាំងរបស់ខ្លួនក៏បានដណ្តើមយកទីប្រជុំជន Torske ផងដែរនៅចុងភាគឦសាន និងកំពុងខិតនៅជិតទីក្រុងពីរផ្សេងទៀត ដែលទីក្រុងមូស្គូចង់បានជាយូរមកហើយគឺក្រុង Sloviansk និង Kramatorsk។

របាយការណ៍អគ្គសេនាធិការនៃយោធាអ៊ុយក្រែន បានដាក់ឈ្មោះភូមិ Novoooleksandrivka ថាជាទីតាំងលំនៅមួយក្នុងចំណោមរាប់សិបផ្សេងទៀត ដែលស្ថិតក្រោមការវាយប្រហាររបស់រុស្ស៊ី ប៉ុន្តែមិនបាននិយាយពីភូមិ Torske ទេ ខណៈប្លុកយោធាដ៏ពេញនិយម DeepState និយាយថា កងកម្លាំងរុស្ស៊ី ព្យាយាមដណ្តើមទីតាំងឈរជើងទាំងនេះ ប៉ុន្តែត្រូវបណ្តេញចេញ៕