យោងតាមរបាយការណ៍ថ្មីមួយកាលពីថ្ងៃព្រហស្បតិ៍ (១៥ ឧសភា) សប្ដាហ៍នេះ ពីនាយកដ្ឋានកិច្ចការសេដ្ឋកិច្ច និងសង្គមរបស់អង្គការសហប្រជាជាតិ ហៅកាត់ថា UN DESA បានឱ្យដឹងថា កំណើនភាពតានតឹងពាណិជ្ជកម្ម និងភាពមិនច្បាស់លាស់នៃគោលនយោបាយនានាក្នុងពេលដ៏ខ្លី បានធ្វើឱ្យសេដ្ឋកិច្ចពិភពលោករងរលករញ្ជួយដ៏រន្ធត់ និងស្ថិតក្នុងចំណុចរបត់ដ៏ផុយស្រួយ។

សម្ពាធតម្លៃដែលជំរុញដោយពន្ធ កំពុងបន្ថែមទៅលើហានិភ័យអតិផរណា ធ្វើឱ្យសេដ្ឋកិច្ចដែលពឹងផ្អែកលើពាណិជ្ជកម្ម មានភាពងាយរងគ្រោះជាពិសេស។ ពន្ធខ្ពស់ និងគោលនយោបាយផ្លាស់ប្តូរពាណិជ្ជកម្ម កំពុងគំរាមកំហែងដល់ការរំខានដល់ខ្សែច្រវាក់ផ្គត់ផ្គង់សកល បង្កើនថ្លៃដើមផលិតកម្ម និងពន្យារពេលការសម្រេចចិត្តវិនិយោគសំខាន់ៗ ដែលទាំងអស់នេះធ្វើឱ្យចុះខ្សោយនូវចក្ខុវិស័យកំណើនពិភពលោក។

របាយការណ៍និយាយថា ការធ្លាក់ចុះសេដ្ឋកិច្ចគឺរីករាលដាលខ្លាំង ដែលប៉ះពាល់ដល់ប្រទេសសេដ្ឋកិច្ចអភិវឌ្ឍ និងកំពុងអភិវឌ្ឍន៍ជុំវិញសកលលោក។ នៅដើមឆ្នាំ២០២៥ អតិផរណាបានលើសពីមធ្យមភាគមុនជំងឺរាតត្បាតនៅក្នុងបណ្ដាប្រទេសចំនួន ២ ភាគ ៣ ជុំវិញពិភពលោក ជាមួយនឹងប្រទេសដែលមានសេដ្ឋកិច្ចកំពុងអភិវឌ្ឍជាង២០ កំពុងជួបប្រទះនឹងអត្រាអតិផរណាពីរខ្ទង់។

ទីភ្នាក់ងារ DESA បាននិយាយថា នៅសហរដ្ឋអាមេរិក កំណើនត្រូវបានព្យាករថានឹងថយចុះ "គួរឱ្យកត់សម្គាល់" ដោយសារតែពន្ធខ្ពស់ និងភាពមិនច្បាស់លាស់នៃគោលនយោបាយ ត្រូវបានគេរំពឹងថានឹងដាក់បន្ទុកលើការវិនិយោគឯកជន និងការចំណាយរបស់អ្នកប្រើប្រាស់៕