នគរបាល បាននិយាយកាលពីថ្ងៃព្រហស្បតិ៍ (ទី១៥ ខែឧសភា)ថា មនុស្សយ៉ាងហោចណាស់ ១៣នាក់បានរងរបួស នៅពេលដែលអ្នកបើកបរម្នាក់ បានបាត់បង់ម្ចាស់ការ ហើយបានបើករថយន្តបុកហ្វូងមនុស្សដែលបានប្រមូលផ្តុំគ្នា នៅខាងក្រៅការប្រកួតបាល់ទាត់រវាងក្រុម RCD Espanyol និង ក្រុម FC Barcelona។

នគរបាល បាននិយាយថា មនុស្សជាច្រើន បានរងរបួស នៅពេលដែលរថយន្តនោះ បានបុកហ្វូងមនុស្សនៅខាងក្រៅកីឡដ្ឋាន RCD Españyol ក្នុងទីក្រុង Barcelona នៅពេលចាប់ផ្តើមការប្រកួត។

នគរបាល បានបន្ថែមនៅក្នុងសេចក្តីថ្លែងការណ៍មួយ នៅលើគេហទំព័រប្រព័ន្ធផ្សព្វផ្សាយសង្គម X ថាឧបទ្ទវហេតុនេះ មិនបានបង្ហាញពីគ្រោះថ្នាក់ណាមួយ ដល់ហ្វូងមនុស្សនៅខាងក្នុងកីឡដ្ឋាននោះទេ។

លោក Salvador Illa ប្រធានាធិបតីតំបន់កាតាឡាន (Catalan) បាននិយាយកាលពីថ្ងៃព្រហស្បតិ៍ថា អ្នករងរបួសទាំងអស់គឺ «តិចតួច» ហើយបានច្រានចោលការបើករថយន្តបុកហ្វូងមនុស្សដោយចេតនាណា។

អ្នកបើកបររថយន្តនោះ ត្រូវបានសមត្ថកិច្ចឃាត់ខ្លួនពីបទសង្ស័យបើកបរបង្កគ្រោះថ្នាក់ និងបង្ករបួស ស្នាម។