នាយករដ្ឋមន្ត្រីអង់គ្លេស លោក Keir Starmer បាននិយាយថា ប្រធានាធិបតីរុស្ស៊ី លោក Vladimir Putin «ត្រូវតែជួបនឹងផលវិបាក ដោយសារការចៀសវាងមិនបង្កើតសន្តិភាព» ដោយការលើកឡើងនេះកើតមាននៅមុនកិច្ចប្រជុំសហគមន៍នយោបាយអឺរ៉ុប នៅប្រទេសអាល់បានី នាថ្ងៃសុក្រ (ទី១៦ ខែឧសភា) នេះ។

តាមរយៈសេចក្តីថ្លែងការណ៍មុនកិច្ចប្រជុំកំពូលនេះ ពោលគឺធ្វើឡើងនៅថ្ងៃដដែល ដែលកិច្ចពិភាក្សាត្រូវបានរំពឹងកើតមាន រវាងអ៊ុយក្រែន និងរុស្ស៊ី នៅក្នុងប្រទេសទួរគី លោក Starmer បានប្រាប់ថា៖ «យុទ្ធសាស្ត្ររបស់លោក Putin ក្នុងការបង្វែរ និងពន្យារពេល ខណៈបន្តសម្លាប់ និងបង្ហូរឈាម នៅទូទាំងប្រទេសអ៊ុយក្រែន គឺជារឿងមិនអាចអត់ទ្រាំបានតទៅទៀតទេ»។

គួរបញ្ជាក់ថា សហគមន៍នយោបាយអឺរ៉ុប (EPC) ដែលប្រមូលផ្តុំសមាជិកសហភាពអឺរ៉ុប និង ២០ប្រទេសផ្សេងទៀត កំពុងជួបប្រជុំគ្នា នៅរដ្ឋធានី Tirana នៃប្រទេសអាល់បានី នៅថ្ងៃទី១៦ ខែឧសភានេះ។ EPC ត្រូវបានបង្កើតឡើងតាមគំនិតផ្តួចផ្តើមរបស់ប្រធានាធិបតីបារាំង លោក Emmanuel Macron ក្នុងឆ្នាំ២០២២ ដើម្បីឆ្លើយតបទៅនឹងការលុកលុយរបស់រុស្ស៊ីលើអ៊ុយក្រែន។

បើយោងតាមវិមាន Downing Street បានឲ្យដឹងថា បណ្ដាប្រទេសចូលរួម នៅក្នុងកិច្ចប្រជុំនេះ នឹង «ដាក់សម្ពាធលើវិមានក្រឹមឡាំង ដោយសារលោក Putin មិនបានចូលរួមកិច្ចចរចាសន្តិភាពដែលរៀបចំឡើងដោយសហរដ្ឋអាមេរិក នៅទីក្រុងអ៊ីស្តង់ប៊ុល កាលពីម្សិលមិញ (ថ្ងៃព្រហស្បតិ៍ ទី១៥ ខែឧសភា)»។

លោក Starmer បាននិយាយថា៖ «បទឈប់បាញ់ពេញលេញដោយគ្មានលក្ខខណ្ឌ ត្រូវតែលេចរូបរាងឡើង ហើយប្រសិនបើរុស្ស៊ីមិនមានឆន្ទៈចូលតុចរចាទេ លោក Putin ត្រូវតែប្រឈមជាមួយផលវិបាក»៕