ឧត្ដមសេនីយ៍ឯក ជួន ណារិន្ទ ស្នងការនគរបាលរាជធានីភ្នំពេញ បានលើកឡើងក្នុងបណ្ដាញសង្គម នាព្រឹកថ្ងៃទី១៧ ខែឧសភា ឆ្នាំ ២០២៥ថា « ប៉ុន្មានថ្ងៃនេះ មានការជជែកវែកញែកច្រើន​តាម​បណ្ដាញសង្គម លើករណីគ្រោះថ្នាក់ចរាចរណ៍​ កាលពីរសៀលថ្ងៃ ទី១៥ ខែឧសភា ២០២៥ មុខក្រសួងមហាផ្ទៃ ធ្វើឱ្យមានអ្នករបស់ធ្ងន់ស្រាល និងបាត់បង់ជីវិតមនុស្ស​ ដែលបង្ករឡើងដោយ នគរបាលរាជធានីម្នាក់ ឈ្មោះ ហ៊ុន ហេង ភេទប្រុស »។

ស្នងការនគរបាលរាជធានី បន្ថែមថាភ្លាមៗ លោកបានបញ្ជាឱ្យជំនាញ និង មូលដ្ឋាន ចុះដល់កន្លែងកើតហេតុគឺ ចាត់ចែង ឃាត់ខ្លួនអ្នកបង្ករ (វាស់ជាតិអាល់កុល) សង្រ្គោះ អ្នករបួស និងរៀចចំសណ្ដាប់ធ្នាប់។ ច្បាប់គឺមិនបានបែកចែកវណ្ណៈនោះទេ គឺអនុវត្តន៍ដូចគ្នា ស្មើភាពគ្នា (ខ្ញុំបាទមិនដែលលើកលែងទេអ្នកប្រព្រឹត្តបទល្មើស)។

ឧត្ដមសេនីយ៍ឯក ជួន ណារិន្ទ បានសង្កត់ធ្ងន់ថា ​ពេលនេះ ឈ្មោះ ហ៊ុន ហេង បានរៀបចំ​នីតិវិធីបញ្ជូន​ទៅតុលាការ​នាព្រឹកនេះ ព្រមទាំង​អនុវត្តន៍​នូវ​បទពិន័យនគរបាលជាតិកម្ពុជា​បណ្ដេញ​ចេញពីក្របខ័ណផងដែរ។​ លោក​ក៏បានសំណូមពរដល់អ្នកប្រើប្រាស់មធ្យោបាយលើផ្លូវគ្រប់ប្រភេទ ត្រូវតែចូលរួមគោរពច្បាប់​ចរាចរណ៍ជាដាច់ខាតទាំងអស់គ្នា (បើស្រវឹងកុំបើកបរ)៕