សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានថ្លែងអះអាងប្រាប់សាធារណជន ថា ករណីមន្ត្រីនគរបាលម្នាក់ ដែលបានបើកបរក្រោមឥទ្ធិពលជាតិស្រវឹងបង្កគ្រោះថ្នាក់ចរាចរណ៍ បណ្ដាលឱ្យមានមនុស្សស្លាប់នោះ គឺមិនរួចខ្លួនឡើយ ត្រូវតែខុសត្រូវចំពោះមុខច្បាប់ និងការសងសំណង ដល់ជនរងគ្រោះ ។

សម្តេចធិបតី ហ៊ុន ម៉ាណែត នាយករដ្ឋមន្ត្រី ខណៈអញ្ជើញជាអធិបតីដ៏ខ្ពង់ខ្ពស់ ក្នុងពិធីសម្ពោធ អគារសិក្សា និងសមិទ្ធផលនានានៅវិទ្យាល័យ ហ៊ុន សែន ប្រម៉ោយ ក្នុងស្រុកវាលវែង ខេត្តពោធិ៍សាត់ នាព្រឹកថ្ងៃទី១៧ ខែឧសភា នេះ បានបញ្ជាក់ជំហរដោយម៉ឺងម៉ាត់ថា រាជរដ្ឋាភិបាល គឺនៅតែបន្តរឹតបន្តឹងការ អនុវត្តច្បាប់ដោយមិនមានការលើកលែង ឬការយោគយល់នោះឡើយ។ ជនបង្កត្រូវបានអនុវត្តតាមនីតិវិធី របស់ច្បាប់ ដោយផ្ដល់សំណងដល់ជនរងគ្រោះហើយ ត្រូវទទួលទោសទណ្ឌទៅតាមច្បាប់កំណត់ថែម ទៀត គឺមិនមានករណីរួចខ្លួន ឬ លើកលែងនោះឡើយ។

សម្តេចបវរធិបតី​នាយករដ្ឋមន្ត្រី បានអំពាវនាវឱ្យប្រជាពលរដ្ឋជឿទុកចិត្តលើប្រព័ន្ធយុត្តិធម៌កម្ពុជា ដោយអនុវត្តដូចគ្នាទាំងអស់ ។

នៅព្រឹកនេះ ឧត្ដមសេនីយ៍ឯក ជួន ណារិន ស្នងការនគរបាលរាជធានីភ្នំពេញ បានសរសេរសារ លើហ្វេសប៊ុកបញ្ជាក់ថា បន្ទាប់ពីមានការជជែកវែកញែកច្រើនតាមបណ្ដាញសង្គម លើករណី​គ្រោះថ្នាក់ចរាចរណ៍ កាលពីរសៀលថ្ងៃទី១៥ ខែឧសភា នេះ នៅមុខក្រសួងមហាផ្ទៃ ធ្វើឱ្យមាន​អ្នករបួសធ្ងន់ស្រាល​ និងបាត់បង់ជីវិតមនុស្ស ដែលបង្កឡើងដោយនគរបាលរាជធានី​ ១នាក់ ឈ្មោះ ហ៊ុន ហេង ភេទប្រុស។ ឯក ឧត្ដមបានដាក់បញ្ជាឱ្យជំនាញចាត់ចែង​ឃាត់ខ្លួនអ្នកបង្កបញ្ជូន​ទៅតុលាការហើយ។ ច្បាប់ គឺមិនបាន បែកចែកវណ្ណៈនោះទេ គឺអនុវត្តដូចគ្នា ស្មើភាពគ្នា ៕ អត្ថបទ៖ វ៉ាន់