​ទូកក្ដោង​៖ ការប្រកួត​កីឡា​ទូកក្ដោង​ជ្រើសរើស​ជើងឯក​អាស៊ីអាគ្នេយ៍ឆ្នាំ​២០២១ នៅ​ឆ្នេរ​សុខាខេត្ត​ព្រះសីហនុបានបញ្ចប់​ការប្រកួត​រយៈពេល ២​ថ្ងៃ​មកហើយគិត​ត្រឹម​ល្ងាច​ថ្ងៃទី​១៤ ខែធ្នូ។

ចំពោះ​លទ្ធផល​ការប្រកួត​នៅ​ថ្ងៃទី​២ រួមមាន​៖ ១-​វិញ្ញាសា​ ILCA 7 កីឡាករ​កម្ពុជា ញូ​វ ចាន់ ដែល​ឈរ​លេខ​១ កាលពី​ថ្ងៃ​ដំបូងបាន​ធ្លាក់​មកឈរ​លេខ​២ ស្របពេល​កីឡាករ​ម៉ាឡេស៊ីឡើងឈរ​លេខ​១ វិញ។ ឯ​កីឡាករ ឡុ​ច ដា​រ៉ុង បន្ដ​ឈរ​លេខ​៣។​ ២-​វិញ្ញាសា​ ILCA 6 កីឡាករ​​កម្ពុជា ២​រូប​បន្ដ​ឈរ​លេខ៤ និង​លេខ៥ ក្នុងចំណោម​កីឡាករ ៥​រូប ខណៈ​កីឡាករ​សិង្ហ​បុរីបន្ដ​ឈរ​លេខ​១ លេខ​២ និង​លេខ​៣។ ៣-​វិញ្ញាសា​ RS:One កីឡាករ​កម្ពុជា ៣​រូបបន្ដ​គ្រង​ចំណាត់ថ្នាក់​លេខ​១ លេខ​២ និង​លេខ៣ ​រួមមាន​កីឡាករ ផល សិលា​, សែម ប្រុស​ពៅ និង ហេន សុ​ភី តាម​ពីក្រោយ​ដោយ​កីឡាករ​សិង្ហ​បុរី ២​រូប។​ ៤-​វិញ្ញាសា​ Techno 293 កីឡាករ​កម្ពុជា កែវ ភា​រុណ បាន​ធ្លាក់​ពី​លេខ​១ មក​លេខ​២ ខណៈ​កីឡាករ​សិង្ហ​បុរី David NG Tiong Gee ដែល​ឈរ​លេខ​៣ កាលពី​ថ្ងៃ​បើកឆាកបាន​ឡើងឈរ​លេខ​១ វិញ និង​កីឡាករ Angel Chew របស់​សិង្ហ​បុរី​ម្នាក់ទៀតឈរ​លេខ​៣។ វិញ្ញាសា​នេះកម្ពុជា​បញ្ជូន​កីឡាករ ៥​រូប​ចូលរួមក្នុងចំណោម​កីឡាករ​សរុប ៨​នាក់។​ ៥-​វិញ្ញាសា ILCA 4 កីឡាករ​សិង្ហ​បុរីឡើងឈរ​លេខ​១ និង​លេខ​២ វិញបន្ទាប់​ពីថ្ងៃ​បើកឆាក​កីឡាករ​ម៉ាឡេស៊ីឈរ​លេខ​១។ ប៉ុន្ដែ​វិញ្ញាសា​នេះកម្ពុជា​ពុំបាន​បញ្ជូន​កីឡាករ​ចូលរួម​ប្រកួត​នោះទេ។​

​សូមបញ្ជាក់ថា ព្រឹត្តិការណ៍​នេះមាន​អត្ត​ព​លិ​ក ២៧​នាក់​មកពី ៣​ប្រទេស​ចូលរួមដែល​ប្រកួត​លើ ៥​វិញ្ញាសា ហើយ​វិញ្ញាសា​នីមួយៗកីឡាករ​ម្នាក់ៗ​ត្រូវធ្វើ​ការប្រកួត​យ៉ាងហោច ១៦​ជុំដើម្បី​កំណត់​កីឡាករ​ជ័យលាភី ខណៈ​រយៈពេល ២​ថ្ងៃ​កន្លងមកទើប​ប្រកួត​បាន ៧​ជុំ​ប៉ុណ្ណោះ។ តាម​គម្រោងការ​ប្រកួត​កីឡា​ទូកក្ដោង​ជើងឯក​អាស៊ាន​នេះនឹង​បញ្ចប់​នា​ថ្ងៃទី​១៧ ខែធ្នូ​ខាងមុខ៕

​អត្ថបទ៖ លី ឈុន​ឡា