ក្រុមមន្ត្រីបាននិយាយនៅថ្ងៃចន្ទ (១៩ ឧសភា) នេះថា ក្រុមជួយសង្គ្រោះឥណ្ឌូនេស៊ី កំពុងស្វែងរកមនុស្ស ១៩នាក់ ដែលបាត់ខ្លួន បន្ទាប់ពីភ្លៀងធ្លាក់ខ្លាំងបានបណ្តាលឱ្យមានបំណាក់ដីនៅឯអណ្តូងរ៉ែមាសមួយក្នុងតំបន់ ប៉ាពួ (Papua) នៅចុងបូព៌ារបស់ប្រទេស និងបានសម្លាប់មនុស្សយ៉ាងតិចម្នាក់។

លោក Abdul Muhari អ្នកនាំពាក្យទីភ្នាក់ងារកាត់បន្ថយគ្រោះមហន្តរាយឥណ្ឌូនេស៊ី បាននិយាយថា ភ្លៀងធ្លាក់យ៉ាងគំហុក បានបង្កឱ្យមានបំណាក់ដីកាលពីល្ងាចថ្ងៃសុក្រសប្ដាហ៍មុន នៅក្នុងអណ្តូងរ៉ែខ្នាតតូច គ្រប់គ្រងដោយអ្នកស្រុកនៅតំបន់ភ្នំ Arfak ក្នុងខេត្ត វេស ប៉ាពួ (West Papua)។

លោកបន្ថែមថា បំណាក់ដីបានវាយប្រហារលើជម្រកបណ្តោះអាសន្ន ដែលប្រើប្រាស់ដោយអ្នករុករករ៉ែ ហើយបានសម្លាប់មនុស្សយ៉ាងហោចណាស់ម្នាក់ និងរបួស ៤នាក់ ហើយមនុស្ស ១៩នាក់ផ្សេងទៀតនៅតែបាត់ខ្លួន ខណៈចំនួនអ្នកស្លាប់ និងរបួសអាចកើនឡើង។ ក្រុមមន្ត្រីនិយាយថា អ្នកជួយសង្គ្រោះយ៉ាងតិច ៤០នាក់ ជាមួយនឹងនគរបាល និងទាហាន ត្រូវបានដាក់ពង្រាយដើម្បីស្វែងរកអ្នកបាត់ខ្លួន។

ការជីកយករ៉ែក្នុងទ្រង់ទ្រាយតូច និងខុសច្បាប់ ជារឿយៗនាំឱ្យមានគ្រោះថ្នាក់ជាច្រើននៅក្នុងប្រទេសឥណ្ឌូនេស៊ី ជាទីដែលធនធានរ៉ែស្ថិតនៅតំបន់ដាច់ស្រយាល ក្នុងលក្ខខណ្ឌពិបាកសម្រាប់អាជ្ញាធរក្នុងការគ្រប់គ្រង៕