ភ្នំពេញ៖ ឯកឧត្តមទេសរដ្ឋមន្ត្រី ស៊ុន ចាន់ថុល បានលើកទឹកចិត្ត ឲ្យក្រុមហ៊ុនអាមេរិកបន្តវិនិយោគកាន់តែច្រើន និងវាយតម្លៃខ្ពស់ចំពោះសំឡេងពួកគេ ក្នុងការបង្កើតគោលនយោបាយរបស់ សភាពាណិជ្ជកម្មអាមេរិកនៅកម្ពុជា។

ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ដ្រីក្រសួងសាធារណការ និងដឹកជញ្ជូន មានប្រសាសន៍បែបនេះ នៅយប់ថ្ងៃទី១៤ ខែធ្នូ ឆ្នាំ២០២១ ខួបលើកទី២៥ របស់​សភាពាណិជ្ជកម្មអាមេរិកនៅកម្ពុជា (AmCham Cambodia) នឹងជំរុញឲ្យមានការអភិវឌ្ឍពាណិជ្ជកម្ម និងការវិនិយោគរវាងសហរដ្ឋអាមេរិក និងកម្ពុជា។ ពិធីនេះ រៀបចំឡើងនៅសណ្ឋាគារ Raffle Le Royal។

នៅក្នុងកម្មវិធីនេះ មានការអញ្ជើញចូលរួមពីសំណាក់ឯកឧត្តម ទេសរដ្ឋមន្ដ្រី លី ធុជ អនុប្រធានទី១ អាជ្ញាធរមីន, ឯកឧត្តម ហ៊ុន ​ម៉ានី,លោកជំទាវ ឱ វណ្ណឌីន រដ្ឋលេខាធិការក្រសួង សុខាភិបាល និងថ្នាក់ដឹកនាំជាន់ខ្ពស់កម្ពុជា-អាមេរិក ជាច្រើនរូបទៀត។

ក្នុងឱកាសនោះ លោក Anthony Galliano ប្រធាន AmCham បាននិយាយថា AmCham បានប្រារព្ធខួបលើកទី២៥ របស់ខ្លួននៅឆ្នាំ២០២១ ជាមួយនឹងឆ្នាំដ៏រឹងមាំបំផុតក្នុងប្រវត្តិសាស្ត្ររបស់ AmCham។

គូសបញ្ជាក់ថា AmCham Cambodia (សភាពាណិជ្ជកម្មអាមេរិកនៅកម្ពុជា) បាន​បង្កើតឡើង​ក្នុងឆ្នាំ១៩៩៦ ជាអង្គការសមាជិកភាពឯករាជ្យមិនរកប្រាក់ចំណេញដែលមាន ទាំងក្រុមហ៊ុនអាមេរិក និងកម្ពុជា ​ដែលចែករំលែកការតភ្ជាប់ទៅនឹងពាណិជ្ជកម្មអាមេរិក។

AmCham ដើរតួនាទីយ៉ាងសំខាន់ក្នុងដំណើររឿង ​នៃការអភិវឌ្ឍន៍សេដ្ឋកិច្ចរបស់កម្ពុជា និង​ជា​សំឡេងឈានមុខគេ​ ក្នុងសហគមន៍ធុរកិច្ចអន្តរជាតិរបស់កម្ពុជា៕

អត្ថបទ៖ សូដាវណ្ណ