ប្រភពបានរាយការណ៍ថា អ៊ីស្រាអែល និងក្រុមហាម៉ាស កាលពីថ្ងៃអាទិត្យ (១៨ ឧសភា) កំពុងពិចារណាលើសំណើមួយសម្រាប់កិច្ចព្រមព្រៀងបទឈប់បាញ់ដោះដូរចំណាប់ថ្នូរ ដែលនឹងមើលឃើញការដោះលែងអ្នកជាប់ឃុំនៅរស់ប្រហែលពាក់កណ្តាល ពោលគឺប្រមាណ ១០នាក់ ក្នុងដៃក្រុមប៉ាឡេស្ទីនមួយនេះ ជាថ្នូរនឹងបទឈប់បាញ់ប្រហែល ២ខែ និងការដោះលែងអ្នកទោសសន្តិសុខប៉ាឡេស្ទីន។

មន្ត្រីជាន់ខ្ពស់ក្រុមហាម៉ាស លោក Sami Abu Zuhri បដិសេធការយល់ព្រមនៃរបាយការណ៍នេះ ហើយបានអះអាងឡើងវិញនូវជំហររបស់ក្រុមហាម៉ាសថា ខ្លួនត្រៀមរួចជាស្រេចក្នុងការដោះលែងចំណាប់ថ្នូរទាំងអស់នៅពេលតែមួយ ក្នុងលក្ខខណ្ឌដែលអ៊ីស្រាអែល យល់ព្រមបញ្ចប់សង្រ្គាមជាអចិន្រ្តៃយ៍ ជាមួយនឹងការធានាពីអន្តរជាតិ។

សារព័ត៌មាន Axios បានរាយការណ៍កាលពីថ្ងៃអាទិត្យថា ប្រេសិតពិសេសរបស់លោកប្រធានាធិបតីអាមេរិក Donald Trump គឺលោក Steve Witkoff បានបង្ហាញសំណើសម្រាប់ការដោះលែងចំណាប់ថ្នូរ ១០នាក់ ជាថ្នូរនឹងបទឈប់បាញ់រយៈពេល ៤៥ថ្ងៃ ទៅ ៦០ថ្ងៃនៅហ្កាហ្សា និងការដោះលែងអ្នកទោសសន្តិសុខ ហើយទីក្រុងវ៉ាស៊ីនតោន កំពុងដាក់សម្ពាធឱ្យភាគីទាំងពីរទទួលយកសំណើនេះ។

របាយការណ៍ ដែលសម្អាងដល់ពីមន្ត្រីអ៊ីស្រាអែលម្នាក់ និងប្រភដឹងផ្ទាល់ពីសំណើនេះ បានឱ្យដឹងថា ការផ្តល់ជូនថ្មីនោះ រួមមានឃ្លាដែលបានកែប្រែរួច ក្នុងគោលបំណងផ្តល់ការធានាដល់ក្រុមហាម៉ាសថា បទឈប់បាញ់បណ្តោះអាសន្នអាចនាំទៅដល់ការផ្អាកប្រយុទ្ធជាអចិន្ត្រៃយ៍នៅក្នុងដែនដីហ្កាហ្សា៕