ស្ថានទូតអាមេរិកប្រចាំប្រទេសលីប៊ីកាលពីថ្ងៃអាទិត្យ បានច្រានចោលរបាយការណ៍ដែលថា រដ្ឋាភិបាលសហរដ្ឋអាមេរិក កំពុងធ្វើការលើផែនការផ្លាស់ប្តូរទីលំនៅប្រជាជនប៉ាឡេស្ទីន ពីតំបន់ហ្កាហ្សាស្ទ្រីប ទៅកាន់ប្រទេសលីប៊ី។

កាលពីថ្ងៃព្រហស្បត្តិ៍ សារព័ត៌មាន NBC News បានរាយការណ៍ថា រដ្ឋបាលរបស់លោក ដូណាល់ ត្រាំ កំពុងធ្វើការលើផែនការ ដើម្បីផ្លាស់ប្តូរទីលំនៅជាអចិន្ត្រៃយ៍របស់ជនជាតិប៉ាឡេស្ទីនរហូតដល់មួយលាននាក់ ពីតំបន់ហ្កាហ្សាស្ទ្រីប ទៅកាន់ប្រទេសលីប៊ី។

កាសែត NBC News បានដកស្រង់សម្តីមនុស្ស ៥នាក់ ដែលដឹងអំពីបញ្ហានេះ រួមទាំងមនុស្សពីរនាក់ ដែលបានដឹងយ៉ាងច្បាស់ និងអតីតមន្ត្រីអាមេរិកម្នាក់។

ស្ថានទូតអាមេរិក បាននិយាយនៅលើវេទិកាបណ្តាញសង្គម X ថា៖«របាយការណ៍នៃគម្រោងផ្លាស់ប្តូរទីលំនៅប្រជាជនហ្កាហ្សា ទៅកាន់ប្រទេសលីប៊ី គឺមិនពិតនោះទេ។

រដ្ឋាភិបាលឯកភាពជាតិដែលទទួលស្គាល់ដោយអន្តរជាតិមានមូលដ្ឋាននៅទ្រីប៉ូលី មិនអាចទាក់ទង ដើម្បី សុំការអត្ថាធិប្បាយភ្លាមៗបានទេ។

លោក ត្រាំ ធ្លាប់បាននិយាយថា លោកចង់ឲ្យសហរដ្ឋអាមេរិកគ្រប់គ្រងតំបន់ហ្កាហ្សាស្ទ្រីប ហើយប្រជាជនប៉ាឡេស្ទីនរបស់ខ្លួន ត្រូវទៅតាំងទីលំនៅថ្មី នៅកន្លែងផ្សេង។

ប្រជាជនប៉ាឡេស្ទីនបដិសេធយ៉ាងដាច់ខាតនូវផែនការណាមួយដែលពាក់ព័ន្ធនឹងពួកគេចាកចេញពីតំបន់ហ្កាហ្សា ដោយប្រៀបធៀបគំនិតបែបនេះ ទៅនឹងពាក្យ «ណាក់បា[Nakba]» ឬ «មហន្តរាយ» ឆ្នាំ ១៩៤៨ នៅពេលដែលមនុស្សរាប់សែននាក់ ត្រូវបានរុះរើផ្ទះរបស់ពួកគេ នៅក្នុងសង្រ្គាមដែលនាំទៅដល់ការបង្កើតអ៊ីស្រាអែល។