ក្រុមឧទ្ទាមហ៊ួទី ដែលជាសម្ព័ន្ធមិត្តអ៊ីរ៉ង់នៅប្រទេសយេម៉ែន បានប្រកាសកាលពីថ្ងៃចន្ទ ទី១៩ ខែឧសភា ជាអ្វីដែលពួកគេហៅថា «ការបិទផ្លូវសមុទ្រ» សម្រាប់កំពង់ផែ Haifa របស់អ៊ីស្រាអែល ដើម្បីឆ្លើយតបទៅនឹងជម្លោះដែលនៅបន្តរបស់អ៊ីស្រាអែល នៅតំបន់ហ្កាហ្សា។

លោក Yahya Saree អ្នកនាំពាក្យរបស់ក្រុម បាននិយាយនៅក្នុងសុន្ទរកថាតាមទូរទស្សន៍ថា «ក្រុមហ៊ុនទាំងអស់ដែលមានវត្តមាននាវា នៅក្នុង ឬធ្វើដំណើរឆ្ពោះទៅកាន់កំពង់ផែ Haifa ត្រូវបានផ្តល់ព័ត៌មានថា ចាប់តាំងពីពេលនៃការប្រកាសនេះ កំពង់ផែដែលបានរៀបរាប់ខាងលើ ត្រូវបានដាក់បញ្ចូលទៅក្នុងបញ្ជីគោលដៅ។

ក្រុមហ៊ួទី បានបន្តបាញ់មីស៊ីលទៅកាន់អ៊ីស្រាអែល រួមទាំងនៅអាកាសយានដ្ឋាន Ben Gurion ក្បែរទីក្រុង Tel Aviv ជាអ្វីដែលពួកគេនិយាយថា សាមគ្គីភាពជាមួយពលរដ្ឋប៉ាឡេស្ទីននៅតំបន់ហ្កាហ្សា ទោះបីជាក្រុមនេះបានព្រមព្រៀងបញ្ឈប់ការវាយប្រហារលើនាវារបស់សហរដ្ឋអាមេរិកក៏ដោយ។ មីស៊ីលដែលក្រុមនេះបានបាញ់ទៅលើអ៊ីស្រាអែល ភាគច្រើនត្រូវបានស្ទាក់ចាប់។

អ៊ីស្រាអែល បានធ្វើការវាយប្រហារក្នុងការឆ្លើយតប រួមទាំងការវាយប្រហារមួយលើកកាលពីថ្ងៃទី៦ ខែឧសភា ដែលបានបំផ្លាញអាកាសយានដ្ឋានធំក្នុងទីក្រុងសាណារបស់ប្រទេសយេម៉ែន និងបានសម្លាប់មនុស្សជាច្រើននាក់។