​បាល់ទាត់៖ ​ក្រុម​ម្ចាស់ផ្ទះ​សិង្ហ​បុរី​បាន​កក់​កៅអី​នៅ​វគ្គ​ពាក់កណ្តាល​ផ្តាច់ព្រ័ត្រ AFF Championship ហើយ​ក្រោយ​ជ័យជំនះ​លើ​ទី​ម័​រ​ឡេ​ស្តេ ២-០​។ ​​ចាប់ផ្តើម​បានតែ ៤នាទី​សិង្ហ​បុរី​រកបាន​គ្រាប់​នាំមុខ​ទៅហើយ​ដោយ Adam Swandi តែ​គ្រាប់​ទី​ពីរ​ត្រូវ​រង់ចាំ​ដល់​វគ្គ​ទី២ នាទី​ទី៧០ ដោយ​គ្រាប់​បាល់​របស់ Shakir Hamzah និង​ជា​គ្រាប់​ចុងក្រោយ​ផងដែរ​ក្នុង​ការប្រកួត​នេះ​ ធ្វើឱ្យ​សិង្ហ​បុរី​យកឈ្នះ​ទី​ម័​រ​ដោយ​លទ្ធផល ២-០​។

​​គ្រូបង្វឹក​សិង្ហ​បុរី​លោក Tatsuma Yoshida និយាយថា ទី​ម័​រ​ធ្វើ​បានល្អ​ណាស់​ប្រកួត​នេះ តែ​ក៏​សរសើរ​កូនក្រុម​របស់លោក​ដែល​រកបាន​ ២​គ្រាប់​ជា​ជ័យជំនះ​ដ៏​មាន​សារសំខាន់ នាំ​ក្រុម​សិង្ហ​បុរី​ឡើង​វគ្គ​ពាក់កណ្តាល​ផ្តាច់ព្រ័ត្រ ​ដែល​ខកខាន​ច្រើន​ព្រឹត្តិការណ៍​មកហើយ​។ ​​រីឯ​គ្រូបង្វឹក​ទី​ម័​រលោក Bruno Maciel ថ្វីបើ​បរាជ័យ​តែ​លោក​ចាត់ទុកថា​ជា​ប្រកួត​ដ៏​ល្អ​មួយ​សំរាប់​ទី​ម័​រ ​ដែល​បានដាក់​បញ្ចូល​កីឡាករ​ចាស់​បំផុត​ត្រឹម​អាយុ ២៣ឆ្នាំ និង​មាន​កីឡាករ​អាយុ ១៧ឆ្នាំ​ពីរ​នាក់​ផងដែរ​។ ​​ជ័យជំនះ​នេះ​បានធ្វើឱ្យ​សិង្ហ​បុរី​កក់​កៅអី​នៅ​វគ្គ​ពាក់កណ្តាល​ផ្តាច់ព្រ័ត្រ AFF Championship ២០២០ នេះ​តាំងពី​ឆ្នាំ២០១២ ដែល​ឈ្នះ​ជើងឯក​។​ ​នៅសល់​មួយ​ប្រកួត​ចុងក្រោយ​ក្នុង​ពូ​ល ថៃ​នឹង​ត្រូវ​ជួប​ជាមួយ​សិង្ហ​បុរី​ដើម្បី​បញ្ជាក់​ថា ​ក្រុម​ណា​ជា​ម្ចាស់​ពូ​ល A នេះ​៕

​អត្ថបទ​៖​នាង សុភា​វុ​ធ