ប្រធានាធិបតីអ៊ុយក្រែន លោក Volodymyr Zelensky កាលពីថ្ងៃចន្ទ (១៩ ឧសភា) បានចេញការព្រមានដល់សហរដ្ឋអាមេរិក ដោយលើកឡើងថា ការដកខ្លួនចេញពីកិច្ចខិតខំប្រឹងប្រែងសន្តិភាពអ៊ុយក្រែន នឹងក្លាយជាការហុចផលប្រយោជន៍ដោលផ្ទាល់ទៅឱ្យប្រធានាធិបតីរុស្ស៊ី លោក Vladimir Putin។

ថ្លែងបន្ទាប់ពីលោកប្រធានាធិបតីអាមេរិក Donald Trump សន្ទនាតាមទូរសព្ទទាំងជាមួយលោក Zelenskiy និងលោក Putin ជាផ្នែកនៃគំនិតផ្តួចផ្តើមថ្មីដើម្បីបញ្ចប់សង្រ្គាមរយៈពេល ៣ឆ្នាំមកនេះ មេដឹកនាំអ៊ុយក្រែនរូបនេះបានសង្កត់ធ្ងន់ថា ការចូលរួមរបស់សហរដ្ឋអាមេរិក នៅតែជារឿងសំខាន់បំផុត។

លោក Zelenskiy បាននិយាយនៅលើប្រព័ន្ធផ្សព្វផ្សាយសង្គមថា "នេះជាសារៈសំខាន់ណាស់សម្រាប់ភាគីទាំងអស់ ដែលសហរដ្ឋអាមេរិក មិនត្រូវឃ្លាតឆ្ងាយពីកិច្ចពិភាក្សា និងការស្វែងរកសន្តិភាពទេ ពីព្រោះមានតែលោក Putin ប៉ុណ្ណោះដែលទទួលបានប្រយោជន៍ពីការដកខ្លួននេះ"។ លោកក៏សង្កត់ធ្ងន់ផងដែរពីតម្រូវការសម្រាប់ការដាក់ទណ្ឌកម្មរបស់អាមេរិក កាន់តែខ្លាំងលើរុស្ស៊ី ដោយអះអាងថា សកម្មភាពរបស់ទីក្រុងវ៉ាស៊ីនតោន — ឬភាពអសកម្ម — អាចកំណត់ដំណើរនៃសង្រ្គាម។

លោក Trump កាលពីថ្ងៃចន្ទ បានរំលឹកឡើងវិញនូវការគំរាមជាយូរមកហើយរបស់ខ្លួនថា លោកនឹងបោះបង់ចោលកិច្ចខិតខំប្រឹងប្រែងដើម្បីបញ្ចប់សង្រ្គាមរបស់រុស្ស៊ី នៅអ៊ុយក្រែន ប្រសិនបើមិនមានការរីកចម្រើនទេនោះ។ យ៉ាងណាក៏ដោយ ប្រធានាធិបតីអាមេរិករូបនេះបានបញ្ជាក់ជាថ្មីនូវការលើកឡើងនៅមុននេះថា លោកជឿជាក់ថាលោក Putin ចង់បញ្ចប់សង្រ្គាមដ៏បង្ហូរឈាមមួយនេះ៕