​ចិន៖ ប្រទេស​ចិន​បាន​រិះគន់​រដ្ឋមន្ត្រីការបរទេស​សហរដ្ឋអាមេរិក​លោក Antony Blinken បន្ទាប់​ពី​លោក​បាន​និយាយ​ថា​ សហរដ្ឋអាមេរិក​នឹងបន្ថែម​វត្តមាន​យោធា និង​ទំនាក់ទំនង​សេដ្ឋកិច្ច​របស់ខ្លួន​ជាមួយដៃគូ​ក្នុង​តំបន់​អាស៊ី ដើម្បី​រុញច្រាន​ប្រឆាំង​ទៅ​នឹង​ការ​បង្កើន​ឥទ្ធិពល​របស់​ប្រទេស​ចិន នៅ​ក្នុង​តំបន់​ឥណ្ឌូ​-​ប៉ាស៊ីហ្វិក​។ នៅ​ក្នុង​សន្និសីទ​សារព័ត៌មាន​ប្រចាំថ្ងៃអ្នកនាំពាក្យ​ក្រសួង​ការ​បរទេស​ចិនលោក Wang Wenbin បាន​និយាយ​ថា ការ​អត្ថាធិប្បាយ​របស់​លោក Blinken បង្ហាញ​ថា សហរដ្ឋអាមេរិក​កំពុង​និយាយ​ប្រឆាំង​ខ្លួនឯង ខណៈ​អះ​អាង​ថា ខ្លួន​គ្មាន​បំណង​ស្វែង​រក​ជម្លោះ​ជាមួយ​ប្រទេស​ចិន​នោះ​ទេ​។

​ក្នុងអំឡុងពេល​ថ្លែង​សុន្ទរកថា​នៅ​ក្នុង​ប្រទេស​ឥណ្ឌូនេស៊ីលោក Blinken បាន​និយាយ​ថា រដ្ឋបាល​លោក Biden សន្យា​រក្សា​សន្តិភាព និង​វិបុលភាព​ក្នុង​តំបន់ ហើយ​នឹង​អនុវត្ត​ការ​ជំរុញសម្ព័ន្ធ​ភាពរបស់​សហរដ្ឋអាមេរិក និង​បង្កើត​ទំនាក់ទំនង​ថ្មីក្នុង​តំបន់​នេះ​។​ ​ខណៈ​ទទូច​ថា ​សហរដ្ឋ​អាមេរិក​មិន​ព្យាយាម​បង្ខំ​ឱ្យ​ប្រទេស​ជាច្រើន ជ្រើសរើស​រវាង​សហរដ្ឋអាមេរិក និង​ប្រទេស​ចិន ឬ​ស្វែងរក​ជម្លោះ​ជាមួយ​ប្រទេស​ចិន​នោះ លោក Blinken បាន​និយាយ​អំពី​សកម្មភាព​ឈ្លានពាន​របស់​ទីក្រុង​ប៉េកាំង ចាប់ពី​តំបន់​អាស៊ី​ឦសាន​ដល់​តំបន់​អាស៊ីអាគ្នេយ៍ និង​ពីទន្លេ​មេគង្គ​ទៅដល់​ប្រជុំ​កោះ​ប៉ាស៊ីហ្វិក​។ លោក Wang បាន​ចាត់​ទុក​ការ​អត្ថាធិប្បាយ​នេះ​ថា​ ជា​ការ​ញុះញង់​ធ្វើ​ឱ្យ​មាន​ការ​បែក​បាក់ និង​ការ​ប្រឈម​មុខ​ដាក់គ្នា​។

លោក Blinken បាន​និយាយ​ថា សហរដ្ឋអាមេរិកនឹង​បង្កើត​ទំនាក់ទំនង​កាន់តែ​រឹងមាំ ​ជាមួយ​សម្ព័ន្ធមិត្ត​សន្ធិសញ្ញា​ចំនួន​ប្រាំ​ប្រទេសរបស់​ខ្លួននៅ​ក្នុង​តំបន់មាន​ប្រទេស​អូស្ត្រាលី ជប៉ុន ហ្វីលីពីន កូរ៉េខាងត្បូង និង​ប្រទេស​ថៃ ដោយជំរុញទំនាក់ទំនង​រវាង​ប្រទេស​ទាំងនេះ និងលើកកម្ពស់​ភាពជា​ដៃគូ​កាន់តែ​រឹងមាំ​ជាមួយ​សមាគមប្រជាជាតិ​អាស៊ីអាគ្នេយ៍ ខណៈ​បណ្ដា​ប្រទេស​ទាំងនេះ​គិត​ថា​ មានការ​គំរាមកំហែង​ពី​ប្រទេស​ចិន​។ លោក Wang បាន​ប្រឆាំង​ដោយ​ចោទ​ក្រុង​វ៉ាស៊ីនតោន អំពី​គោលនយោបាយ​ដែល​ធ្វើ​ឲ្យ​ប៉ះពាល់​ដល់​ការ​មិន​ចុះ​សម្រុង​គ្នា បំផ្លាញ​សាមគ្គីភាព និង​បង្អាក់​កិច្ច​សហប្រតិបត្តិការ​៕

អត្ថបទ៖ ប៊ុនថន