លោក Mahmoud al-Haw គឺជាជនប៉ាឡេស្ទីនមួយរូបស្ថិតនៅក្នុងចំណោមមនុស្សរាប់រយនាក់ ផ្សេងទៀត ដែលប្រជ្រៀតគ្នានៅមុខផ្ទះបាយស៊ុប ស្ថិតក្នុងទីក្រុង Jabalia តំបន់ហ្កាហ្សា ដើម្បីដណ្តើម ស៊ុបដែលមិនអាចចម្អែតក្រពះមនុស្សមួយគ្រួសាររបស់លោកបានឡើយ ។

បុរសវ័យ ៣៩ឆ្នាំម្នាក់នេះ មើលថែភរិយារបស់គាត់ និងកូន ៤នាក់របស់គាត់ ក៏ដូចជាកូន ២នាក់របស់បងប្រុសគាត់ ។

លោក Haw និយាយថា កាលពីថ្ងៃចន្ទ លោកបានរង់ចាំអស់រយៈពេលច្រើនម៉ោង ដើម្បីទទួលបានស៊ុបមួយចានសម្រាប់គ្រួសារលោក ដែលជាស៊ុបសម្រាប់អាហារពេលព្រឹក អាហារថ្ងៃត្រង់ និងអាហារពេលល្ងាច ។

លោកបន្តថា ម្សិលមិញ ពួកយើងសំណាងបានរកអាហារសម្រាប់កូនៗរបស់ពួកយើង ។ នេះគឺជាបញ្ហាកំពុងកើតឡើង កូនៗរបស់ពួកយើងនឹងត្រូវស្លាប់ម្តងម្នាក់ៗ ។

ខណៈពេលនោះដែរ អង្គការសហប្រជាជាតិ (UN) បានទទួលការអនុញ្ញាតពីប្រទេសអ៊ីស្រាអែល ដើម្បីឲ្យរថយន្តជំនួយប្រហែល ១០០គ្រឿងបន្ថែមទៀតចូលទៅកាន់តំបន់ហ្កាហ្សា នៅថ្ងៃអង្គារនេះ ។

ក្រុមអ្នកជំនាញមនុស្សធម៌អន្តរជាតិ បានធ្វើការព្រមានពីការជិតកើតមានគ្រោះទុរ្ភិក្សនៅតំបន់ហ្កាហ្សា ហើយនិងអំពាវនាវឲ្យអ៊ីស្រាអែលដកចេញការបិទច្រករយៈពេល ១១សប្តាហ៍លើការផ្គត់ផ្គង់ជំនួយស្បៀងអាហារ ។

អ៊ីស្រាអែល និយាយថា ផែនការរបស់ពួកគេគឺបង្កើនប្រតិបត្តិការយោធាប្រឆាំងក្រុមហាម៉ាស ហើយនិងគ្រប់គ្រងតំបន់ហ្កាហ្សាទាំងមូល ដែលរងភាពខ្ទេចខ្ទាំដោយសារការវាយប្រហារតាមច្រកអាកាស និងជើងគោករបស់អ៊ីស្រាអែល ចាប់តាំងពីការវាយប្រហាររបស់ក្រុមហាម៉ាសលើតំបន់សហគមន៍អ៊ីស្រាអែលកាលពីខែតុលា ឆ្នាំ ២០២៣ ៕