នៅក្នុងសេចក្តីថ្លែងការណ៍ សន្និសិទគ្រឹស្តសាសនានៅប្រទេសម៉ិកស៊ិក បានរាយការណ៍អំពីការសម្លាប់មនុស្សវ័យក្មេងចំនួន៧នាក់ ដែលមួយចំនួនជាអនីតិជននៅក្នុងទីក្រុង Guanajuato ប្រទេសម៉ិកស៊ិកភាគកណ្តាល ហើយកំពុងទាមទាររកយុត្តិធម៌សម្រាប់ជនរងគ្រោះ។

យោងតាមប្រព័ន្ធផ្សព្វផ្សាយជាតិបានឲ្យដឹងថា ការវាយប្រហារលើក្រុមយុវជន បានកើតឡើងនៅទីលានសហគមន៍ San Bartolo de Berrios កាលពីថ្ងៃចន្ទ។ រូបភាពរបស់សារព័ត៌មាន Reuters បានបង្ហាញរន្ធគ្រាប់កាំភ្លើងនៅតាមជញ្ជាំងថ្ម និងទ្វារដែក ដែលត្រូវបានអុជភ្លើងទៀននៅព័ទ្ធជុំវិញនៅទីកន្លែងនោះ។

អ្នកស្រុកម្នាក់ ដែលត្រូវបានកំណត់អត្តសញ្ញាណដោយប្រព័ន្ធផ្សព្វផ្សាយក្នុងស្រុកថាជាបងប្អូនស្រីរបស់យុវជនពីរនាក់ដែលត្រូវបានសម្លាប់ក្នុងការវាយប្រហារនោះបាននិយាយថា «ពួកគេគឺជាសិស្ស ពួកគេមានភាពស្មោះត្រង់» វាត្រូវតែមានយុត្តិធម៌សម្រាប់ពួកគេទាំងអស់គ្នា។

នៅក្នុងសេចក្តីថ្លែងការណ៍របស់ខ្លួន សន្និសិទគ្រឹស្តសាសនានៅប្រទេសម៉ិកស៊ិក បានអំពាវនាវឱ្យអាជ្ញាធរប្រយុទ្ធប្រឆាំងនឹងនិទណ្ឌភាព និងបានសង្កត់ធ្ងន់ថា «យើងមិនអាចស៊ាំទៅនឹងការស្លាប់ដោយអំពើហិង្សា ឬបណ្តោយឱ្យនិទណ្ឌភាពក្លាយជាបទដ្ឋាននោះទេ»។