ភ្លៀងធ្លាក់ខ្លាំងនៅភាគអាគ្នេយ៍អូស្ត្រាលី បានបង្កជាទឹកជំនន់យ៉ាងគំហុក និងកាត់ផ្តាច់ទីប្រជុំជនទាំងមូលនៅថ្ងៃពុធ (២១ ឧសភា) នេះ ដោយបង្ខំឱ្យអ្នកស្រុកមួយចំនួនដែលជាប់ខ្លួនក្នុងទឹក ត្រូវរត់ឡើងលើដំបូលលំនៅឋានរបស់ពួកគេដើម្បីគេចចេញពីគ្រោះថ្នាក់ ខណៈអាជ្ញាធរបានចេញបញ្ជាជម្លៀសភ្លាមៗដោយសារកម្រិតទឹកទន្លេឡើងលើសកម្រិតអាសន្ន។

ទីប្រជុំជនជនបទនៅតំបន់ Hunter និងតំបន់ Mid North Coast នៃរដ្ឋ New South Wales ដែលជារដ្ឋមានប្រជាជនច្រើនជាងគេរបស់អូស្ត្រាលី បានទទួលរងគ្រោះយ៉ាងធ្ងន់ធ្ងរបំផុតពីភ្លៀងធ្លាក់ ដោយតំបន់ខ្លះទទួលបានទឹកភ្លៀងលើសពី ៤ខែ ក្នុងរយៈពេលត្រឹមតែ ២៤ម៉ោងកន្លងមក។

នៅក្នុងបច្ចុប្បន្នភាពចុងក្រោយរបស់ខ្លួន ការិយាល័យឧតុនិយមអូស្ត្រាលី បាននិយាយថា តំបន់មួយចំនួនអាចទទួលបានភ្លៀងរហូតដល់ ៣០០មីលីម៉ែត្រ ក្នុងពេល ២៤ម៉ោងបន្ទាប់ ដែលស្មើនឹង ៣ដងនៃចំនួនសរុបជាមធ្យមសម្រាប់ខែឧសភា។ រូបភាពដែលចែករំលែកលើប្រព័ន្ធផ្សព្វផ្សាយសង្គម បានបង្ហាញអ្នកស្រុកមួយចំនួនកំពុងអង្គុយនៅខាងក្នុងផ្ទះរបស់ពួកគេក្នុងទឹកយ៉ាងជ្រៅ រង់ចាំក្រុមសង្គ្រោះ។

នៅក្នុងទីប្រជុំជន Taree និង Glenthorne ដែលស្ថិតនៅតាមដងទន្លេ Manning ជាង ៣០០គីឡូម៉ែត្រ ភាគខាងជើងទីក្រុងស៊ីដនី អាជ្ញាធរនិយាយថា អ្នកស្រុកមួយចំនួនបានជាប់ខ្លួននៅលើដំបូលផ្ទះ និងរានហាល ដោយក្រុមសង្គ្រោះបន្ទាន់កំពុងជួបការលំបាកពេញមួយយប់ដើម្បីចូលទៅកាន់តំបន់នេះតាមទូក ឬផ្លូវអាកាស៕