ក្រុមហ៊ុនដែលនាំទំនិញចូលទៅសហរដ្ឋអាមេរិក ពីប្រទេសចិន កំពុងប្រញាប់ប្រញាល់ផ្លាស់ប្តូរឃ្លាំងស្តុកទំនិញធម្មតា ទៅជាមូលដ្ឋានដែលត្រូវបានលើកលែងពីពន្ធគយរបស់លោកប្រធានាធិបតីអាមេរិក Donald Trump ឬហៅថា ភណ្ឌាគារគយមានដែនកំណត់ រហូតដល់ពួកគេត្រៀមលក់ទំនិញចេញ។

អាមេរិក មានឃ្លាំងភណ្ឌាគារជាង ១.៧០០កន្លែង ដែលទំនិញនាំចូលអាចរក្សាទុកបានដោយមិនចាំបាច់បង់ពន្ធអាករភ្លាមៗ ដូចជាពន្ធគយជាដើម ដែលបច្ចុប្បន្នមាន ៣០% សម្រាប់ការដឹកជញ្ជូនពីចិន។ ថ្លៃសេវាពន្ធបែបនេះត្រូវបានបង់តែនៅពេលដែលទំនិញចាកចេញពីឃ្លាំងភណ្ឌាគារប៉ុណ្ណោះ ដែលអនុញ្ញាតឱ្យអាជីវកម្មគ្រប់គ្រងមូលនិធិកាន់តែមានប្រសិទ្ធភាព នៅពេលមានការប្រែប្រួលគោលនយោបាយពាណិជ្ជកម្មខ្លាំង។

ការប្រញាប់ប្រញាល់បង្កើតឃ្លាំងស្តុកភណ្ឌាគាររបស់អាមេរិក សម្រាប់ទំនិញនានា រាប់ចាប់ពីសម្លៀកបំពាក់ រហូតដល់គ្រឿងបន្លាស់រថយន្តនេះ គឺជាការប្រថុយរបស់អ្នកនាំចូលមួយចំនួន ដែលជឿថាការដំឡើងពន្ធរបស់សហរដ្ឋអាមេរិក នឹងគ្រាន់តែជាគោលនយោបាយរយៈពេលខ្លីរបស់រដ្ឋបាលលោក Trump ប៉ុណ្ណោះ។

ប្រភពឧស្សាហកម្មចំនួន៤ បានប្រាប់ថា ដោយសារតែសង្គ្រាមពន្ធរបស់លោក Trump ឃ្លាំងភណ្ឌាគារជាច្រើនឥឡូវនេះមានស្តុកទំនិញយ៉ាងពេញទំហឹង ហើយតម្លៃសម្រាប់កន្លែងទំនេរនៅក្នុងឃ្លាំងទាំងនោះក៏កើនឡើងខ្លាំងដែរ ដោយជំរុញឱ្យក្រុមហ៊ុននានាស្នើទៅទីភ្នាក់ងារគយ និងការការពារព្រំដែនរបស់សហរដ្ឋអាមេរិក ដើម្បីពង្រីកឃ្លាំងបែបនេះបន្ថែមទៀត៕