អ្នកនាំពាក្យក្រសួងការបរទេស លោកស្រី Maria Zakharova កាលពីថ្ងៃអង្គារ (ទី២០ ខែឧសភា) បាននិយាយថា ប្រទេសរុស្ស៊ី «មានការសោកស្ដាយ» ចំពោះការសម្រេចរបស់អ៊ីស្រាអែល ក្នុងការបង្កើនសកម្មភាពយោធា នៅតំបន់ហ្កាហ្សាស្ទ្រីប និងចាប់ផ្តើមប្រតិបត្តិការផ្លូវគោកទ្រង់ទ្រាយធំ។

អំឡុងពេលនិយាយនៅឯសន្និសីទសារព័ត៌មាន ក្នុងទីក្រុងមូស្គូ លោកស្រី Zakharova បានគូសបញ្ជាក់ថា ទំហំនៃការវាយប្រហារដោយគ្រាប់រ៉ូកែត និងការទម្លាក់គ្រាប់បែក កើនឡើងយ៉ាងខ្លាំង ដែលនាំឲ្យចំនួនជនស៊ីវិលស្លាប់ និងរបួសមានកាន់តែច្រើន។

លោកស្រីបានសង្កត់ធ្ងន់ថា៖ «របាយការណ៍បង្ហាញថា មនុស្សប្រហែល ៣០០នាក់ ត្រូវបានសម្លាប់ នៅក្នុងការវាយប្រហារលើបរិក្ខារសង្គម និងជម្រករបស់ជនភៀសខ្លួន នៅក្នុងតំបន់ផ្សេងៗនៃដែនដីប៉ាឡេស្ទីនក្នុងរយៈពេល ៣ថ្ងៃកន្លងមកនេះ។ យើងមានការសោកស្ដាយ ចំពោះការសម្រេចបែបនេះរបស់អាជ្ញាធរអ៊ីស្រាអែល ជាវិធានការដែលចៀសមិនរួចនាំឲ្យមានការបាត់បង់ជីវិតជនស្លូតត្រង់ និងការបំផ្លិចបំផ្លាញថ្មីបន្ថែមទៀត»។

លោកស្រី Zakharova បានលើកឡើងថា ផ្លូវតែមួយគត់ ក្នុងការធ្វើឲ្យស្ថានការណ៍ នៅតំបន់ហ្កាហ្សា មានភាពប្រក្រតីឡើងវិញ គឺតាមរយៈការផ្លាស់ប្តូរដំណោះស្រាយជម្លោះទៅជាក្របខ័ណ្ឌនយោបាយ និងការទូត។ លោកស្រីបាននិយាយថា៖ «ដើម្បីសម្រេចបាននូវចំណុចនេះ វាគឺជារឿងចាំបាច់ ក្នុងការធានាឲ្យបាននូវបទឈប់បាញ់ពេញលេញ និងស្តារជំនួយមនុស្សធម៌ សម្រាប់ប្រជាជន នៅតំបន់ហ្កាហ្សាស្ទ្រីប ដោយបង្កើតលក្ខខណ្ឌ ដើម្បីចាប់ផ្តើមដំណើរការនយោបាយឡើងវិញ ក្នុងគោលបំណងស្វែងរកដំណោះស្រាយរយៈពេលវែងដោយយុត្តិធម៌ និងយូរអង្វែង ចំពោះបញ្ហាប៉ាឡេស្ទីន ឈរលើមូលដ្ឋានច្បាប់ដែលត្រូវបានទទួលស្គាល់ជាអន្តរជាតិ»។

លោក Zakharova បាននិយាយថា រុស្ស៊ីកំពុងធ្វើការយ៉ាងសកម្ម និងជាប់លាប់ ដើម្បីសម្រេចឲ្យបានលឿនបំផុតនូវគោលដៅទាំងនេះ ក្នុងកិច្ចសហប្រតិបត្តិការជិតស្និទ្ធជាមួយដៃគូ និងស្ថាប័នដែលមានគំនិតដូចគ្នា ទាំងទ្វេភាគី និងតាមរយៈអង្គការអន្តរជាតិ ជាពិសេសអង្គការសហប្រជាជាតិ៕