មន្ទីរបញ្ចកោណបាននិយាយកាលពីថ្ងៃពុធ ទី២១ ឧសភា ថា រដ្ឋមន្ត្រីការពារជាតិសហរដ្ឋអាមេរិក លោក Pete Hegseth បានទទួលយកយន្តហោះ Boeing 747 ជាអំណោយពីប្រទេសកាតា សម្រាប់លោកប្រធានាធិបតី Donald Trump ដើម្បីបម្រើជាយន្តហោះ Air Force One។ លោក Sean Parnell អ្នកនាំពាក្យ បាននិយាយថា មន្ទីរបញ្ចកោណនឹង «ធ្វើការដើម្បីធានាបាននូវវិធានការសន្តិសុខត្រឹមត្រូវ» លើយន្តហោះនេះ និងដើម្បីឱ្យវាមានសុវត្ថិភាពសម្រាប់ការប្រើប្រាស់ដោយប្រធានាធិបតី។ លោកបាននិយាយបន្ថែមថា យន្តហោះនេះត្រូវបានទទួលយក «ដោយស្របទៅតាមច្បាប់ និងបទប្បញ្ញត្តិរបស់សហព័ន្ធទាំងអស់»។

អំណោយសម្រាប់លោក Trump បានកើតឡើងក្នុងអំឡុងពេលដំណើរទ្សនកិច្ចទៅកាន់តំបន់មជ្ឈិមបូព៌ារបស់លោកប្រធានាធិបតី Trump កាលពីពេលថ្មីៗនេះ។ លោក Trump បានបង្ហោះនៅលើបណ្តាញ Truth Social ខណៈកំពុងធ្វើដំណើរថា «ហេតុអ្វីបានជាយោធារបស់យើង និងអ្នកបង់ពន្ធរបស់យើង ត្រូវបង្ខំចិត្តចំណាយប្រាក់រាប់រយលានដុល្លារ ខណៈយើងអាចទទួលបានយន្តហោះដោយឥតគិតថ្លៃ»។

ទោះបីជាយ៉ាងណា មានការលើកឡើងពីការព្រួយបារម្ភអំពីយន្តហោះនេះ ថាជាការរំលោភលើបម្រាមរបស់រដ្ឋធម្មនុញ្ញស្តីពីអំណោយបរទេស។

លោក Trump បាននិយាយថា «គេកំពុងផ្តល់ឱ្យកងទ័ពអាកាសសហរដ្ឋអាមេរិកនូវយន្តហោះមួយគ្រឿង»។ ប្រធានាធិបតីគណបក្សសាធារណរដ្ឋរូបនេះ បានបង្ហាញនូវភាពចាំបាច់ខាងសន្តិសុខជាតិសម្រាប់ការធ្វើឱ្យប្រសើរយ៉ាងឆាប់រហ័ស ជាជាងការរង់ចាំឱ្យក្រុមហ៊ុន Boeing បញ្ចប់ការផលិតយន្តហោះសម្រាប់ Air Force One ថ្មី នៅក្នុងការងាររយៈពេលជាច្រើនឆ្នាំទៀត។