រថយន្តក្រុងសាលារៀនមួយគ្រឿងត្រូវបានបំផ្ទុះគ្រាប់បែកនៅភាគនិរតីប្រទេសប៉ាគីស្ថាន ដោយបានសម្លាប់មនុស្ស៦នាក់ ក្នុងនោះមានកុមារ៤នាក់។ នាយករដ្ឋមន្ត្រីប៉ាគីស្ថាន លោក Shehbaz Sharif អះអាងថា ការបំផ្ទុះនេះ ជាការវាយប្រហារភេរវកម្មដែលគាំទ្រដោយប្រទេសឥណ្ឌា។

ឧបទ្ទវហេតុនេះ បានកើតឡើងនៅក្នុងខេត្ត Balochistan កាលពីថ្ងៃពុធ។ រដ្ឋាភិបាលក្នុងតំបន់និយាយថា រថយន្តក្រុងនោះកំពុងដឹកកុមារជាង៤០នាក់ធ្វើដំណើរទៅសាលារៀនដំណើរការដោយយោធា។ ការស៊ើបអង្កេតបឋមបង្ហាញថា ឧបករណ៍បំផ្ទុះកែច្នៃទំនងជាត្រូវបានប្រើប្រាស់ក្នុងការវាយប្រហារនេះ។

នាយករដ្ឋមន្ត្រី លោក Sharif បានចេញសេចក្តីថ្លែងការណ៍មួយ ដោយបានចាត់ទុកថាជាការវាយប្រហារដ៏កំសាកធ្វើឡើងដោយក្រុមភេរវករ ដែលធ្វើប្រតិបត្តិការក្រោមការគាំទ្រពីសំណាក់ប្រទេសឥណ្ឌា។ លោក ពុំបានផ្តល់ហេតុផលសម្រាប់ការអះអាងរបស់លោកទេ។ លោក Sharif បានសង្កត់ធ្ងន់ថា គ្មានកិច្ចខិតខំប្រឹងប្រែងណាមួយនឹងអាចគេចផុតពីចេតនាទុច្ចរិតរបស់ក្រុមភេរវករដែលគាំទ្រដោយប្រទេសឥណ្ឌាឡើយខណៈមានគោលបំណងរារាំងសន្តិភាពនៅខេត្ត Balochistan ។

ប្រទេសឥណ្ឌានិងប៉ាគីស្ថាន បានបើកការវាយប្រហារយោធាប្រឆាំងគ្នាទៅវិញទៅមក ចាប់តាំងពីមានការវាយប្រហារភេរវកម្មនៅតំបន់កាស្មៀរដែលមានជម្លោះ។ ប្រទេសទាំងពីរ បានព្រមព្រៀងបទឈប់បាញ់ កាលពីថ្ងៃទី១០ ខែឧសភា ប៉ុន្តែត្រូវបានគេបារម្ភថា ភាពតានតឹងរវាងភាគីទាំងពីរនឹងកើនឡើង។