ក្នុងអំឡុងពេលចូលរួមមហាសន្និបាតអង្គការសុខភាពពិភពលោក លើកទី៧៨ ក្រោមប្រធានបទ «ពិភពលោករួមគ្នាតែមួយ ដើម្បីសុខភាព One World for Health» ចាប់ពីថ្ងៃទី១៩ និង​បន្ត​រហូត​ដល់​ថ្ងៃទី២៧ ខែឧសភា ឆ្នាំ២០២៥ នៅទីក្រុងហ្សឺណែវ សហព័ន្ធស្វីស។ ឯកឧត្តម​សាស្រ្តា​ចារ្យ ឈាង រ៉ា រដ្ឋមន្រ្តីក្រសួងសុខាភិបាល និងគណៈប្រតិភូ បានទទួលជួបសម្តែងការគួរសម និង​ពិភាក្សា​ការងារជាមួយលោកវេជ្ជបណ្ឌិត Juan Pablo នាយកសកលផ្នែកសុខភាព នៃ​ធនាគារ​ពិភព​លោក និងជានាយកផ្នែកហិញ្ញវត្ថុសកល សម្រាប់ស្រ្តី កុមារ និងយុវវ័យ​ប្រចាំ​នៅ​ទី​ក្រុង​វ៉ាស៊ីន​តោន សហរដ្ឋអាមេរិក នាថ្ងៃទី២១ ខែឧសភា ឆ្នាំ២០២៥។

ឯកឧត្តមស្រ្តាចារ្យរដ្ឋមន្រ្តី បានសម្តែងនូវការស្វាគមន៍ និងថ្លែងអំណរគុណ​យ៉ាង​ជ្រាល​ជ្រៅ​ចំពោះ​ធនាគារពិភពលោក ដែលបានឧបត្ថម្ភគាំទ្រដល់វិស័យសុខាភិបាលកម្ពុជាកន្លងមក ជា​ពិសេស​កម្ម​វិធី​លើក​កម្ពស់​គុណភាព និងសមធម៌សុខាភិបាល កម្មវិធីអាហារូបត្ថម្ភ ការប្រយុទ្ធប្រឆាំង​នឹង​ជំងឺ​មិន​ឆ្លង និងការបណ្តុះបណ្តាលធនធានមនុស្ស រួមទាំងការ​បណ្តុះ​បណ្តាល​មុន​ពេល​បំពេញ​ការងារ​។

លោកវេជ្ជបណ្ឌិត Juan Pablo បានសម្តែងនូវការកោតសរសើរដល់កម្ពុជា ដែលតែង​តែ​សហការ​យ៉ាង​ជិត​ស្និទ្ធ និងគាំទ្រធនាគារពិភពលោក ក្នុងការជំរុញលើកកម្ពស់សេវាសុខាភិបាលកម្ពុជា ព្រម​ទាំង​ប្តេជ្ញាបន្តឧបត្ថម្ភគាំទ្រដល់វិស័យសុខាភិបាលកម្ពុជា៕ អត្ថបទ រដ្ឋា