សាកសពបុរសម្នាក់ត្រូវបានរកឃើញនៅក្នុងរថយន្ត ដែលជាប់ក្នុងទឹកជំនន់នៅភាគអាគ្នេយ៍នៃប្រទេសអូស្ត្រាលី នាថ្ងៃសុក្រ (២៣ ឧសភា) នេះ ធ្វើឱ្យចំនួនអ្នកស្លាប់សរុបកើនឡើងដល់ ៤នាក់ បន្ទាប់ពីភ្លៀងធ្លាក់ឥតឈប់ឈររយៈពេល ៣ថ្ងៃបានកាត់ផ្តាច់ទីប្រជុំជនទាំងមូល ហូរនាំហ្វូងបសុសត្វ បំផ្លិចបំផ្លាញផ្ទះសម្បែង និងប៉ះពាល់ដល់មនុស្សរាប់ម៉ឺននាក់។

នគរបាលនិយាយថា បុរសនោះត្រូវបានរកឃើញនៅជិតតំបន់ Coffs Harbour ប្រហែល ៥៥០គីឡូម៉ែត្រ ភាគខាងជើងនៃទីក្រុងស៊ីដនី។ ក្រុមសង្រ្គោះបានបន្តស្វែងរកមនុស្សបាត់ខ្លួនចាប់តាំងពីទឹកជំនន់បានចាប់ផ្តើមនៅដើមសប្តាហ៍នេះ។

បុគ្គលិកសេវាសង្គ្រោះបន្ទាន់បាននិយាយថា មនុស្សប្រហែល ៥០.០០០នាក់ នៅតែជាប់ខ្លួនក្នុងទឹកនៅឡើយ ខណៈមន្រ្តីកំពុងបង្កើនកិច្ចខិតខំប្រឹងប្រែងផ្ដល់ការផ្គត់ផ្គង់សំខាន់ៗ បន្ទាប់ពីលក្ខខណ្ឌអាកាសធាតុបានធូរស្រាលខ្លះ។ ប៉ុន្តែអាជ្ញាធរនៅតែព្រមានអ្នកស្រុកដែលត្រឡប់ទៅផ្ទះសម្បែងជន់លិចរបស់ពួកគេវិញ ឱ្យបន្តប្រុងប្រយ័ត្នចំពោះគ្រោះថ្នាក់។

អាជ្ញាធរបាននិយាយថា សាលារៀនជាង ១០០កន្លែងនៅតែបិទទ្វារក្នុងថ្ងៃសុក្រនេះ ខណៈហេដ្ឋារចនាសម្ព័ន្ធរាប់ពាន់កន្លែងពុំមានថាមពលអគ្គិសនីប្រើប្រាស់ ហើយទន្លេនឹងស្ថិតនៅលើសកម្រិតគ្រោះថ្នាក់រយៈពេលជាច្រើនថ្ងៃទៀត៕