កាសែត Wall Street Journal បានរាយការណ៍កាលពីថ្ងៃព្រហស្បតិ៍ (២២ ឧសភា) សប្ដាហ៍នេះ ដោយដកស្រង់ប្រភព៣ ដែលដឹងពីកិច្ចសន្ទនាថា ប្រធានាធិបតីអាមេរិក លោក Donald Trump បានប្រាប់មេដឹកនាំអឺរ៉ុបថា លោក Vladimir Putin របស់រុស្ស៊ី មិនទាន់ត្រៀមខ្លួនរួចរាល់នៅក្នុងការបញ្ចប់សង្រ្គាមរបស់លោកលើអ៊ុយក្រែននោះទេ ពីព្រោះលោកជឿជាក់ថាលោកកំពុងតែឈ្នះ។

លោក Trump បានធ្វើការទទួលស្គាល់ដ៏កម្រជាលើកដំបូងនេះអំឡុងពេលសន្ទនាទូរសព្ទជាមួយបណ្ដាមេដឹកនាំអឺរ៉ុប បន្ទាប់ពីកិច្ចពិភាក្សាទូរសព្ទមួយផ្សេងទៀតរបស់លោកជាមួយលោក Putin កាលពីថ្ងៃចន្ទសប្ដាហ៍នេះ។ នេះតំណាងឱ្យការដកថយដ៏គួរឱ្យភ្ញាក់ផ្អើលរបស់លោក Trump ដែលធ្លាប់និយាយម្តងហើយម្តងទៀតថា លោកជឿថាសមភាគីរុស្ស៊ី របស់លោកចាប់អារម្មណ៍ពិតប្រាកដចំពោះសន្តិភាព និងបានជំរុញទីក្រុងគីវ ឱ្យធ្វើសម្បទានសំខាន់ៗ រួមទាំងការបោះបង់ចោលនូវសេចក្តីប្រាថ្នាចូលអង្គការណាតូ ដើម្បីបញ្ចប់សង្រ្គាម។

ការទទួលស្គាល់នេះហាក់ដូចជាមិនបានជំរុញឱ្យលោក Trump បង្កើនសម្ពាធរបស់អាមេរិក លើរុស្ស៊ីទេ។ ទោះបីជាធ្លាប់បានប្រាប់មន្ត្រីអឺរ៉ុបថា លោកនឹងចូលរួមដាក់ទណ្ឌកម្មថ្មីលើរុស្ស៊ី ប្រសិនបើលោក Putin មិនយល់ព្រមចំពោះបទឈប់បាញ់ក្នុងអំឡុងពេលសន្ទនានោះក៏ដោយ ក៏លោក Trump នៅទីបំផុតបានបដិសេធមិនធ្វើដូច្នេះឡើយ។

យោងតាមកាសែត New York Times បន្ទាប់ពីការហៅទូរសព្ទជាមួយលោក Putin លោក Trump បានប្រាប់មេដឹកនាំអ៊ុយក្រែន លោក Volodymyr Zelensky និងប្រមុខរដ្ឋអឺរ៉ុបផ្សេងទៀតថា ពួកគេនឹងត្រូវតែស្វែងរកដំណោះស្រាយចំពោះសង្គ្រាមដោយខ្លួនឯងហើយ។

លោក Trump បានលើកឡើងម្ដងហើយម្ដងទៀតថាលោកនឹងបញ្ចប់សង្រ្គាមអ៊ុយក្រែនអាយុកាលជាង ៣ឆ្នាំនេះឱ្យបានឆាប់រហ័សត្រឹមតែ ២៤ម៉ោងប៉ុណ្ណោះ នៅពេលលោកចូលកាន់តំណែងក្នុងខែមករា។ ប៉ុន្តែលោកបានសម្តែងការខកចិត្តកាន់តែខ្លាំងឡើងក្នុងប៉ុន្មានខែថ្មីៗ ខណៈការទូតរបស់រដ្ឋបាលលោករវាងទីក្រុងមូស្គូ និងទីក្រុងគីវ បានបរាជ័យមិនឈានដល់ការទម្លាយភាពជាប់គាំងណាមួយឡើយ៕