ប្រទេសចិន និងហ្វីលីពីន បានចោទប្រកាន់ដាក់គ្នាទៅវិញទៅមកជាថ្មីម្ដងទៀតហើយ កាលពីថ្ងៃព្រហស្បតិ៍ (២២ ឧសភា) សប្ដាហ៍នេះ បន្ទាប់ពីការប្រឈមមុខយ៉ាងតានតឹងរវាងនាវារបស់ភាគីទាំងពីរចំនួន ២គ្រឿងនៅដែនទឹកជម្លោះនៃសមុទ្រចិនខាងត្បូង ដែលជាឧប្បត្តិហេតុចុងក្រោយបង្អស់ក្នុងការប្រឈមមុខដែនសមុទ្រដ៏យូរអង្វែងនៅផ្លូវទឹកយុទ្ធសាស្ត្រនេះ។

ការិយាល័យជលផលហ្វីលីពីន បាននិយាយថា ជីវិតរបស់នាវិកជនស៊ីវិលម្នាក់ត្រូវប្រឈមនឹងហានិភ័យ នៅពេលឆ្មាំល្បាតឆ្នេរចិន បានប្រើកាណុងបាញ់ទឹក និងបានបង្កការខូចខាតដល់នាវាមួយគ្រឿង ខណៈខ្លួនបានធ្វើការស្រាវជ្រាវតាមសមុទ្រ ជុំវិញថ្មប៉ប្រះទឹកសមុទ្រចិនខាងត្បូងដែលមានជម្លោះ។

ឆ្មាំល្បាតឆ្នេរចិន បានចោទបកទៅវិញថា នាវាហ្វីលីពីន ២គ្រឿង បានចូលដែនទឹកដោយខុសច្បាប់នៅជិតតំបន់ថ្មប៉ប្រះទឹក Subi និង Sandy Cay ហើយរៀបចំបុគ្គលិកដើម្បីចូលចតនៅលើដែនទឹក Sandy Cay។ ឆ្មាំល្បាតឆ្នេរចិន បានបន្ថែមក្នុងសេចក្តីថ្លែងការណ៍មួយថា កងកម្លាំងខ្លួនបានឆ្លើយតបជាមួយនឹងអ្វីដែលខ្លួនពិពណ៌នាថាជាវិធានប្រុងប្រយ័ត្នជាមុន ប្រកបដោយវិជ្ជាជីវៈ និងស្របច្បាប់ ហើយបានទៅឆ្នេរដើម្បីផ្ទៀងផ្ទាត់ និងដោះស្រាយស្ថានភាព។ សេចក្តីថ្លែងការណ៍របស់ចិននេះ មិនបាននិយាយពីការប្រើកាណុងបាញ់ទឹកទេ។

ដែនទឹក Sandy Cay នេះស្ថិតនៅជិតកោះ Thitu ដែលជាកោះធំជាងគេ និងមានសារៈសំខាន់ជាយុទ្ធសាស្ត្រក្នុងចំណោមថ្មប៉ប្រះទឹកទាំង៩ ដែលហ្វីលីពីន កាន់កាប់នៅក្នុងប្រជុំកោះ Spratly ជាទីដែលចិន ម៉ាឡេស៊ី កោះតៃវ៉ាន់ និងវៀតណាម ក៏មានវត្តមាន។ ចិន អះអាងសិទ្ធិអធិបតេយ្យភាពលើសមុទ្រចិនខាងត្បូងស្ទើរតែទាំងអស់ រួមទាំងតំបន់ដែលទាមទារដោយប្រ៊ុយណេ ឥណ្ឌូនេស៊ី ម៉ាឡេស៊ី ហ្វីលីពីន និងវៀតណាមផងដែរ៕