សេចក្ដីរាយការណ៍បានឱ្យដឹងថា កងកម្លាំងរបស់លោកប្រធានាធីបតីរុស្ស៊ី Vladimir Putin កំពុងតែប្រមូលផ្តុំគ្នា និងពង្រីកខ្លួននៅជាប់ព្រំដែនរុស្ស៊ី ជាមួយតំបន់ Sumy របស់អ៊ុយក្រែន បន្ទាប់ពីការជម្លៀសចេញពីតំបន់នេះ និងការគំរាមកំហែងដែលថាទីក្រុងមូស្គូ ដាក់គោលដៅលើទឹកដីបន្ថែមទៀត ក្នុងប្រតិបត្តិការយោធាពិសេសរបស់ខ្លួន។

សារព័ត៌មាន Kyiv Independent រាយការណ៍ថា អភិបាលតំបន់ Sumy លោក Oleh Hryhorov បាននិយាយថា មនុស្សរាប់ពាន់នាក់ត្រូវជម្លៀសចេញពីតំបន់នេះ នៅតាមព្រំដែនភាគឦសានរបស់អ៊ុយក្រែន និងនៅជាប់នឹងតំបន់ Kharkiv ខណៈនៅផ្នែកម្ខាងទៀតនៃព្រំដែនរុស្ស៊ី ចំនួនទាហានរបស់ទីក្រុងមូស្គូ ត្រូវបានដឹងមកថាកំពុងកើនឡើង។

អង្គការមិនរកកម្រៃរបស់អាមេរិកឈ្មោះ វិទ្យាស្ថានសម្រាប់ការសិក្សាសង្គ្រាម បានរាយការណ៍ថា លោក Putin កំពុងព្យាយាមបង្ហាញភាពត្រឹមត្រូវនៃការបន្តផែនការរបស់រុស្ស៊ី ក្នុងការដណ្តើមយកទីក្រុង Sumy — ចម្ងាយជាង ២៥គីឡូម៉ែត្រពីព្រំដែន — និងចង់ដាក់បញ្ចូលតំបន់ Sumy ទាំងមូលដោយខុសច្បាប់។ តែទោះជាយ៉ាងនេះក៏ដោយ សមាជិកសភាអ៊ុយក្រែន លោក Oleksiy Goncharenko បានប្រាប់សារព័ត៌មាន Newsweek ថា ទីក្រុង Sumy ធំពេកហើយដែលធ្វើឱ្យកងកម្លាំងរុស្ស៊ី ពិបាកវាយយកបាន។

ការកើនឡើងនៃវត្តមានកងទ័ពរុស្ស៊ី នៅផ្នែកម្ខាងទៀតនៃព្រំដែនភាគឦសានអ៊ុយក្រែននេះ បង្ហាញសញ្ញាថា លោក Putin ហាក់មិនបានកាត់បន្ថយប្រតិបត្តិការយោធារបស់លោកទេ បើទោះបីជាមានការចរចារជាច្រើនសប្តាហ៍ ដែលដឹកនាំដោយសហរដ្ឋអាមេរិកក៏ដោយ។ សេចក្ដីរាយការណ៍និយាយថា ឥឡូវនេះ តំបន់ Sumy និង Kharkiv របស់អ៊ុយក្រែន ត្រូវបានលើកឡើងថាកំពុងស្ថិតក្នុងក្រសែភ្នែករបស់លោក Putin ហើយការកសាងកម្លាំងទ័ព បង្ហាញពីចេតនាចង់កាន់កាប់ទឹកដីបន្ថែមទៀត ដោយមិនគិតពីការទាមទារឱ្យមានបទឈប់បាញ់៕