អង្គភាពសង្គ្រោះបន្ទាន់ផ្នែកវេជ្ជសាស្រ្ដរបស់ប្រទេសលីប៊ី បាននិយាយកាលពីថ្ងៃព្រហស្បតិ៍ថា ជនភៀសខ្លួនស៊ូដង់ចំនួន១១នាក់បានស្លាប់ដោយសារការខ្សោះជាតិទឹកនៅលើវាលខ្សាច់ភាគខាងត្បូងប្រទេសលីប៊ី បន្ទាប់ពីយានយន្តដឹកពួកគេបានខូចនៅជិតទីក្រុង Kufra ភាគអាគ្នេយ៍ប្រទេសលីប៊ី។

អង្គភាពបាននិយាយនៅក្នុងសេចក្តីថ្លែងការណ៍មួយ ដែលបានបង្ហោះនៅលើទំព័រហ្វេសប៊ុកផ្លូវការរបស់ខ្លួនថា «អ្នកដំណើរស៊ូដង់ដែលបានភៀសខ្លួន បានជាប់គាំងនៅលើវាលខ្សាច់សាហារ៉ា បន្ទាប់ពីរថយន្តរបស់ពួកគេបានខូច»។ សេចក្តីថ្លែងការណ៍បន្ថែមថា ស្ត្រី និងកុមារ ស្ថិតក្នុងចំណោមអ្នកស្លាប់ ហើយ មនុស្ស១៥នាក់ផ្សេងទៀតដែលធ្វើដំណើរជាមួយក្រុមត្រូវបានជួយសង្គ្រោះ។

យោងតាមឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន (UNHCR)បានឲ្យដឹងថា ឧបទ្ទវហេតុនេះ បង្ហាញពីហានិភ័យកើនឡើងដែលប្រឈមដោយអ្នកភៀសខ្លួនចេញពីជម្លោះនៅប្រទេសស៊ូដង់ ដែលបានចាប់ផ្តើមនៅក្នុងខែមេសា ឆ្នាំ២០២៣ ហើយចាប់តាំងពីពេលនោះមក មនុស្សជាង ១២លាននាក់បានភៀសខ្លួនចេញ និងប្រហែល៤លាននាក់ បានឆ្លងចូលប្រទេសជិតខាងដើម្បីស្វែងរកទីសុវត្ថិភាព។

អង្គការUNHCR បាននិយាយថាចំនួនជនភៀសខ្លួនស៊ូដង់នៅក្នុងប្រទេសលីប៊ី បានកើនឡើងដល់ ៣១៣.០០០នាក់ គិតត្រឹមខែឧសភានេះ។ ប្រទេសលីប៊ី ជាចំណុចឆ្លងកាត់ដ៏សំខាន់សម្រាប់ជនអន្តោប្រវេសន៍ និងជនភៀសខ្លួន ដែលមានបំណងទៅដល់អឺរ៉ុប នៅតែបន្តរកមធយោបាយដោះស្រាយបញ្ហាអស្ថិរភាពនយោបាយ និងអសន្តិសុខ។