ឧទ្ធម្ភាគចក្រត្រូវបានប្រើប្រាស់ នៅថ្ងៃអាទិត្យ (២៥ ឧសភា) នេះ ដើម្បីទម្លាក់ចំណីសត្វដល់កសិករ ក្នុងរដ្ឋ New South Wales របស់ប្រទេសអូស្ត្រាលី ដែលជាប់ទៅណាមិនរួចដោយសារទឹកជំនន់ ពោលគឺជាហេតុការណ៍ដែលបានបណ្ដាលឲ្យមនុស្ស ៥នាក់ស្លាប់ និងរាប់ម៉ឺននាក់ទៀតមិនអាចធ្វើដំណើរទៅណាបាន នៅភាគអាគ្នេយ៍របស់ប្រទេស។

ការស្តារឡើងវិញកំពុងដំណើរការ នៅក្នុងតំបន់ឆ្នេរភាគកណ្តាលប៉ែកខាងជើងនៃរដ្ឋដែលមានប្រជាជនច្រើនបំផុតរបស់ប្រទេសអូស្ត្រាលី បន្ទាប់ពីទឹកជំនន់ជាច្រើនថ្ងៃ បានកាត់ផ្តាច់ទីក្រុងនានា កសិដ្ឋានចិញ្ចឹមសត្វត្រូវលិចលង់ និងផ្ទះសម្បែងត្រូវបានបំផ្លិចបំផ្លាញ។ អាជ្ញាធរប៉ាន់ប្រមាណថា យ៉ាងហោចណាស់អចលនទ្រព្យ ១០.០០០ខ្នង អាចនឹងរងការខូចខាតដោយសារជំនន់ ដែលត្រូវបានបង្កឡើងដោយភ្លៀងធ្លាក់ឥតឈប់ឈរជាច្រើនថ្ងៃ។

សេវាសង្គ្រោះបន្ទាន់របស់រដ្ឋ បានបង្ហោះនៅលើបណ្ដាញសង្គម X ថា អ្នកស្រុកប្រហែល ៣២.០០០នាក់ នៅតែដាច់ពីគេឯង ដោយសារតែទឹកជំនន់ដែលកំពុងចាប់ផ្តើមស្រកយ៉ាងយឺតៗ។

រដ្ឋមន្ត្រីក្រសួងកសិកម្មប្រចាំរដ្ឋ លោកស្រី Tara Moriarty បានឲ្យដឹងនៅក្នុងសេចក្តីថ្លែងការណ៍ថា៖ «រដ្ឋាភិបាលរបស់រដ្ឋ New South Wales កំពុងផ្តល់ចំណីសត្វសង្គ្រោះបន្ទាន់ ការថែទាំពីបសុពេទ្យ ការណែនាំអំពីការគ្រប់គ្រង និងការគាំទ្រពីលើអាកាសដល់កសិដ្ឋានដែលនៅដាច់ពីគេឯង។

រដ្ឋាភិបាលរបស់រដ្ឋនេះបានបន្ថែមថា ការទម្លាក់ការផ្គត់ផ្គង់ពីឧទ្ធម្ភាគចក្រចំនួន ៤៣កញ្ចប់ និងប្រហែល ១៣០កញ្ចប់ តាមមធ្យោបាយផ្សេងទៀត បានផ្តល់ដល់ «កសិករនៅដាច់ពីគេឯង ជាមួយនឹងចំណីសត្វបន្ទាន់ សម្រាប់សត្វចិញ្ចឹមរបស់ពួកគេដែលជាប់នៅក្នុងទឹកជំនន់នេះ»៕