លោកប្រធានាធិបតី Prabowo Subianto បានពោលសរសើរទំនាក់ទំនងដ៏ស៊ីជម្រៅរបស់ឥណ្ឌូនេស៊ីជាមួយប្រទេសចិនថា ជាសសរស្តម្ភនៃសន្តិភាព និងវិបុលភាព នៅក្នុងតំបន់អាស៊ីអាគ្នេយ៍ ខណៈដែលលោកបានស្វាគមន៍លោក Li Qiang នៅក្រុងហ្សាការតា សម្រាប់ដំណើរទស្សនកិច្ចការងាររយៈពេល ៣ថ្ងៃរបស់នាយករដ្ឋមន្ត្រីចិន។

នៅពេលចាប់ផ្តើមកិច្ចប្រជុំ រវាងគណៈប្រតិភូនៃប្រទេសទាំង២ នៅឯវិមានប្រធានាធិបតី នាថ្ងៃអាទិត្យ (ទី២៥ ខែឧសភា) លោក Prabowo បានលើកឡើងថា៖ «ប្រទេសរបស់យើងទាំង២ មានប្រវត្តិសាស្ត្រដ៏យូរអង្វែង ហើយឥឡូវនេះ យើងបានក្លាយជាដៃគូដែលមានទំនាក់ទំនងជាយុទ្ធសាស្ត្រគ្រប់ជ្រុងជ្រោយ។ យើងឃើញថា ទំនាក់ទំនងនេះ នឹងនាំមកនូវភាពល្អប្រសើរ ដែលមិនត្រឹមតែសម្រាប់ប្រទេសរបស់យើងទាំង២ ប៉ុណ្ណោះទេ ប៉ុន្តែថែមទាំងសម្រាប់តំបន់អាស៊ីទាំងមូល និងប្រហែលជាសូម្បីតែសម្រាប់ពិភពលោកលោកផងដែរ»។

លោកបានបន្ថែមថា៖ «ប្រទេសឥណ្ឌូនេស៊ី និងចិនមានការទទួលខុសត្រូវយ៉ាងធំធេង ក្នុងការបង្កើតតំបន់ដែលមានសុវត្ថិភាព និងវិបុលភាព»។ ហើយជាមួយគ្នានេះ លោក Prabowo បានបញ្ជាក់បន្ថែមថា ប្រទេសឥណ្ឌូនេស៊ីនឹងបន្តគាំទ្រ និងពន្លឿនដល់ការបញ្ចប់នៃការចរចា ស្ដីពីក្រមប្រតិបត្តិដែលមានគោលបំណងដោះស្រាយភាពតានតឹង និងទប់ស្កាត់ជម្លោះ នៅសមុទ្រចិនខាងត្បូង។

គួរបញ្ជាក់ថា ដំណើរទស្សនកិច្ចរបស់លោក Li ដែលជាលើកដំបូងរបស់លោកទៅកាន់ឥណ្ឌូនេស៊ី គិតចាប់តាំងពីលោក Prabowo ចូលកាន់តំណែងក្នុងខែតុលា ឆ្នាំ២០២៤ គឺសំដៅឆ្ពោះទៅរកការពង្រឹងកិច្ចសហប្រតិបត្តិការទ្វេភាគី និងនិរន្តរភាពនៃសន្ទុះនៃការមានទំនាក់ទំនងកម្រិតខ្ពស់។

សម្រាប់លោក Prabowo លោកបានជួបប្រធានាធិបតីចិន លោកស ស៊ី ជីនពីង (Xi Jinping) ចំនួន ២ដង ក្នុងឆ្នាំ២០២៤ ហើយបានជជែកតាមទូរសព្ទជាមួយមេដឹកនាំចិន ក្នុងខែមេសា៕