អាជ្ញាធរបានប្រាប់ឲ្យដឹងថា មនុស្សចំនួន ១៨នាក់ បានរងរបួស ដោយ ៤នាក់ស្ថិតក្នុងស្ថានភាពធ្ងន់ធ្ងរ អំឡុងការវាយប្រហារដោយកាំបិត កាលពីថ្ងៃសុក្រ (ទី២៣ ខែឧសភា) នៅក្នុងទីក្រុង Hamburg របស់ប្រទេសអាល្លឺម៉ង់។

នគរបាលទីក្រុង Hamburg បានប្រាប់ថា ពួកគេបានចាប់ខ្លួនស្ត្រីជនជាតិអាល្លឺម៉ង់វ័យ ៣៩ឆ្នាំម្នាក់ ដែលពួកគេជឿថា បានធ្វើសកម្មភាពតែម្នាក់ឯង ក្នុងការវាយប្រហារនៅឯស្ថានីយ៍រថភ្លើងកណ្តាលទីក្រុង បន្ទាប់ពីមានប្រតិបត្តិការដ៏ធំមួយរបស់នគរបាល។ នគរបាលបានឲ្យដឹងទៀតថា ស្ត្រីជាជនសង្ស័យ កំពុងត្រូវបានឃុំខ្លួននៅមន្ទីរឃុំឃាំងរបស់នគរបាល ហើយគេរំពឹងថា នឹងត្រូវបាននាំខ្លួនទៅតុលាការ កាលពីថ្ងៃសៅរ៍ (ទី២៤ ខែឧសភា)។

ជាមួយគ្នានេះ នគរបាលបានបញ្ជាក់ថា មនុស្ស ៧នាក់ «បានរងរបួសធ្ងន់» ខណៈមនុស្ស ៧នាក់ផ្សេងទៀត «បានរងរបួសស្រាល» ហើយជនរងគ្រោះមានអាយុចន្លោះពី ១៩ឆ្នាំ ដល់៨៥ឆ្នាំ។ ជាមួយគ្នានេះ តាមរយៈការផ្ដល់បច្ចុប្បន្នភាព កាលពីថ្ងៃសៅរ៍ នគរបាលបានឲ្យដឹងថា ចំណែកអ្នករងរបួសធ្ងន់ធ្ងរទាំង ៤នាក់ ដែលរួមមាននារីអាយុ ២៤ឆ្នាំ បុរសអាយុ ២៤ឆ្នាំ ស្ត្រីវ័យ ៥២ឆ្នាំ និងស្ត្រីវ័យ ៨៥ឆ្នាំ ស្ថិតក្នុងស្ថានភាពមានស្ថិរភាព។

ការស៊ើបអង្កេតលើហេតុការណ៍នេះកំពុងបន្តធ្វើ។ តែនគរបាលបានប្រាប់ថា មានភស្តុតាងជាក់ស្តែង ដែលបង្ហាញថា ជនសង្ស័យមានជំងឺផ្លូវចិត្ត។ នៅក្នុងសេចក្តីថ្លែងការណ៍មួយកាលពីល្ងាចថ្ងៃសុក្រ នគរបាលទីក្រុង Hamburg បានឲ្យដឹងថា អ្នកវាយប្រហារ បានធ្វើសកម្មភាព «ចាក់អ្នកដើរកាត់ដោយមិនរើសមុខ ដែលនាំឲ្យអ្នកខ្លះរងរបួសធ្ងន់ធ្ងរ»៕