អាជ្ញាធរគ្រប់គ្រងគ្រោះមហន្តរាយខេត្ត (PDMA) បានបញ្ជាក់នៅក្នុងសេចក្តីប្រកាសព័ត៌មានថា យ៉ាងហោចណាស់មនុស្ស ៨នាក់ បានបាត់បង់ជីវិត ហើយ ៤៥នាក់ផ្សេងទៀត បានរងរបួស នៅពេលដែលមានព្យុះធូលីដ៏ខ្លាំងក្លាដែលបន្ទាប់មកបន្តដោយភ្លៀងធ្លាក់ខ្លាំងនៅពាសពេញផ្នែកខ្លះនៃខេត្ត Punjab របស់ប្រទេសប៉ាគីស្ថាន កាលពីថ្ងៃសៅរ៍ (ទី២៤ ខែឧសភា)។

ខ្យល់ព្យុះដែលបានកើតឡើងបន្ទាប់ពីមានរលកកម្ដៅរយៈពេល ១សប្តាហ៍ បានបណ្តាលឲ្យផ្ទះជាច្រើនខ្នងបាក់រលំ និងបានធ្វើឲ្យអ្នកស្រុកងាយរងគ្រោះរួចហើយនោះស្ថិតនៅក្នុងទីតាំងដែលមិនមានសុវត្ថិភាព។ PDMA បានរាយការណ៍ថា អ្នកស្លាប់ភាគច្រើន គឺដោយសារការធ្លាក់កម្ទេចកម្ទីសំណង់អគារទ្រុឌទ្រោម។ ផ្ទះជាច្រើនខ្នង ក៏រងការខូចខាត អំឡុងពេលមានខ្យល់ព្យុះនេះដែរ។

នៅទីក្រុង Lahore របស់ខេត្តនេះ ខ្យល់ព្យុះបានរំលើងដើមឈើ និងបំផ្លាញផ្ទាំងសូឡា។ ហើយអាជ្ញាធរបានជំរុញឲ្យប្រជាពលរដ្ឋស្នាក់នៅតែក្នុងផ្ទះ និងចៀសវាងការចេញក្រៅ ប្រសិនបើមិនចាំបាច់។

ជាមួយគ្នានេះ នាយកដ្ឋានឧតុនិយមប៉ាគីស្ថានបានព្យាករពីលទ្ធភាពនៃការមានព្យុះធូលី និងផ្គររន្ទះ សម្រាប់ថ្ងៃនេះ។ អ្នកនាំពាក្យរបស់ PDMA បានកត់សម្គាល់ថា ឧប្បត្តិហេតុដែលទាក់ទងនឹងព្យុះនេះ រីករាលដាលពាសពេញតំបន់ជាច្រើន ហើយថា ក្រុមឆ្លើយតបបន្ទាន់ត្រូវបានដាក់ពង្រាយ។

ខណៈដែលកិច្ចខិតខំប្រឹងប្រែងស្តារឡើងវិញ នៅតែបន្តធ្វើ ក្រុមមន្ត្រីកំពុងណែនាំប្រជាពលរដ្ឋឲ្យចៀសវាងរចនាសម្ព័ន្ធមិនមានស្ថិរភាព និងបន្តតាមដានយ៉ាងដិតដល់ ចំពោះការណែនាំ អំពីអាកាសធាតុបន្ថែមទៀត៕