នៅថ្ងៃទី២៥ ខែឧសភា ឆ្នាំ២០២៥ គណៈមេធាវីនៃព្រះរាជាណាចក្រកម្ពុជា បានរៀបចំការប្រឡងដើម្បីជ្រើសរើសចូលរៀនវិជ្ជាជីវៈមេធាវីជំនាន់ទី២០ ដែលធ្វើឡើងនៅបណ្ឌិត្យសភាភូមិន្ទយុត្តិធម៌កម្ពុជា ដោយមានការចូលរួមសង្កេតការណ៍ពីមន្ត្រីអង្គភាពប្រឆាំងអំពើពុករលួយ។ 

លោកមេធាវី សាំង វណ្ណៈ ប្រធានគណៈមេធាវីនៃព្រះរាជាណាចក្រកម្ពុជា បានបញ្ជាក់ថា ការប្រលងជ្រើសរើសបេក្ខជនចូលរួមវិជ្ជាជីវិៈមេធាវី ជំនាន់ទី២០ នៅពេលនេះ គឺឆ្លើយតបទៅនឹង គោលនយោបាយដឹកនាំលោកមេធាវី ស្តីពីការពង្រឹងការសុំចូលប្រកបវិជ្ជាជីវៈមេធាវី ដោយឈេរលើគោលការណ៍តម្លាភាព ដើម្បីធានានូវគុណភាព ប្រសិទ្ធិភាព និង ឧត្តមភាពនៃវិជ្ជាជីវៈមេធាវី “ចេះគឺជាប់” ស្របជាមួយនឹងគោលនយោបាយរាជរដ្ឋាភិបាល អាណត្តិទី៧ នៃរដ្ឋសភា ក្រោមការដឹកនាំប្រកបដោយភាពប៉ិនប្រសព្វ និង ស្វាហាប់ប្រកបដោយគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ។ លោកមេធាវី សាំង វណ្ណៈ បានបន្ថែមថា ការប្រឡងនេះ ធ្វើឡើងយ៉ាងត្រឹមត្រូវ មានតម្លាភាពបំផុត ក្រោមការសង្កេតការណ៍របស់អង្គភាពប្រឆាំងអំពើពុករលួយ ។ 

ដោយឡែកវិញ្ញាសារនៃប្រឡង រួមមាន៖ វិញ្ញាសាសរសេរចំនួន២មុខវិជ្ជាគឺទី១ គឺទ្រឹស្តីទូទៅនីតិរដ្ឋប្បវេណី និងនីតិវិធីរដ្ឋប្បវេណី ទី២ នីតិព្រហ្មទណ្ឌទូទៅ​ នីតិព្រហ្មទណ្ឌពិសេស និងនីតិវិធីព្រហ្មទណ្ឌ។ សម្រាប់វិញាសាសរសេរនេះនឹងត្រូវប្រកាសលទ្ធផលយ៉ាងយូរនៅថ្ងៃទី២៩ ខែឧសភា ឆ្នាំ២០២៥។ ក្រៅពីវិញ្ញាសាសរសេរ បេក្ខជនត្រូវជម្រុះបន្តមកកាន់វិញ្ញាសាសំណួរផ្ទាល់មាត់។ ការប្រឡងវិញ្ញាសាផ្ទាល់មាត់មាន៣មុខវិជ្ជារួមមាន៖ នីតិពាណិជ្ជកម្ម នីតិការងារ នីតិរដ្ឋបាល ដោយបេក្ខជននឹងតម្រូវអោយចាប់យកមុខវិជ្ជា១ក្នុងចំណោម៣ រួចបន្តទៅឆ្លើយចំពោះមុខគណកម្មការសម្រាប់មុខវិជ្ជាចំណេះដឹងទូទៅនៅក្នុងវិស័យច្បាប់និង យុត្តិធម៌ដែលអនុវត្តនៅក្នុងព្រះរាជាណាចក្រកម្ពុជា។ លទ្ធផលស្ថាពរ នឹងប្រកាសយ៉ាងយូរនៅថ្ងៃទី៦ ខែមិថុនា ឆ្នាំ២០២៥។ ឆ្លងកាត់ការប្រឡងចំនួន២ដំណាក់កាលនេះ បេក្ខជនដែលត្រូវជ្រើសរើសស្ថាពរអោយចូលរៀនវិជ្ជាជីវៈមេធាវីសរុបចំនួន៤០រូប ។ 

សូមបញ្ជាក់ថា បេក្ខជនដែលមានសិទ្ធិប្រឡងចំនួន ៦១៩នាក់ ស្រីចំនួន ២៤០នាក់ ដែលចំនួននេះ ត្រូវបានគណៈមេប្រយោគប្រជុំសម្រេច និង ក្រុមប្រឹក្សាគណៈមេធាវីបានប្រជុំសម្រេចជាឯកច្ឆ័ន្ទនាសម័យប្រជុំរបស់ក្រុមប្រឹក្សាគណៈមេធាវីកាលពីថ្ងៃទី១៦ ខែឧសភា ឆ្នាំ២០២៥៕ អត្ថបទ៖​សូដាវណ្ណ