សមាជិកសភា មកពីបណ្តាប្រទេសអ៊ឺរ៉ុប និងអារ៉ាប់ បានជួបប្រជុំគ្នានៅទីក្រុងម៉ាឌ្រីដ ប្រទេសអេស្ប៉ាញកាលពីថ្ងៃអាទិត្យ ទី២៥ ឧសភា ដើម្បីពិភាក្សាអំពីសង្គ្រាមនៅតំបន់ហ្កាហ្សា។ ថ្លែងនៅក្នុងកិច្ចប្រជុំ អាជ្ញាធរប៉ាឡេស្ទីន លោក Mohammad Mustafa បានប្រាប់អ្នកសារព័ត៌មានថា លោកចង់ឃើញសហរដ្ឋអាមេរិកចូលរួម តាមដែលអាចធ្វើទៅបាន។

លោក Mustafa និយាយថា ការចូលរួមកាន់តែច្រើន ការចូលរួមជាវិជ្ជមាន ដោយសហរដ្ឋអាមេរិក នឹងជួយនាំមកនូវសន្តិភាព និងស្ថិរភាពសម្រាប់តំបន់នេះ។ រដ្ឋមន្ត្រីការបរទេសអេស្បាញ លោក Jose Manuel Albares បាននិយាយថា ការពង្រឹងការហាមឃាត់អាវុធគឺចាំបាច់បំផុត។

លោក Albares និយាយថា ប្រទេសចំនួន២០ បានចូលរួមកិច្ចប្រជុំកំពូលនេះ។ រឿងចុងក្រោយដែលតំបន់មជ្ឈិមបូព៌ាត្រូវការនៅពេលនេះ គឺសព្វាវុធ ហើយយើងត្រូវពិនិត្យឡើងវិញនូវបញ្ជីទណ្ឌកម្មបុគ្គលដែលយើងទាំងអស់គ្នាមាន ហើយសហភាពអឺរ៉ុបក៏មាន។

យោងតាមអាជ្ញាធរសុខាភិបាលតំបន់ហ្កាហ្សាបានឲ្យដឹងថា ជម្លោះនៅហ្កាហ្សា បានសម្លាប់ពលរដ្ឋប៉ាឡេស្ទីនជាង ៥៣.៩០០នាក់ ហើយក្រុមផ្តល់ជំនួយនិយាយថា សញ្ញានៃកង្វះអាហារូបត្ថម្ភធ្ងន់ធ្ងរ បានរាលដាលយ៉ាងធ្ងន់ធ្ងរ។