ទូកក្តោង៖ ឆ្លងកាត់ការប្រកួតកីឡាទូកក្តោងជ្រើសរើសជើងឯកអាស៊ីអាគ្នេយ៍ឆ្នាំ២០២១ នៅខេត្តព្រះសីហនុរយៈពេល ៤ថ្ងៃកន្លងមក ប្រធានគណៈកម្មការរៀបចំការប្រកួតលោក Chan Khun Sing Joseph បានធ្វើការវាយតម្លៃខ្ពស់ចំពោះមន្ដ្រីគណៈកម្មការបច្ចេកទេសកម្ពុជាថា មានសមត្ថភាពគ្រប់គ្រាន់ដើម្បីរៀបចំការប្រកួតអន្ដរជាតិនានា។
ការអះអាងរបស់អ្នកជំនាញជនជាតិសិង្ហបុរីរូបនេះ ក្រោយព្រឹត្តិការណ៍ប្រចាំតំបន់នេះបានដំណើរការប្រកួតរយៈពេល ៤ថ្ងៃគិតត្រឹមថ្ងៃទី១៦ ខែធ្នូ មុនឈានដល់ការប្រកួតថ្ងៃចុងក្រោយនាថ្ងៃទី១៧ ខែធ្នូនេះ។ ប៉ុន្ដែសម្រាប់ការប្រកួតថ្ងៃទី៤ ម្សិលមិញ គណៈកម្មការបានសម្រេចលុបចោលដោយសារបញ្ហាខ្យល់មិនគ្រប់គ្រាន់ ស្របតាមស្ដង់ដារអាចប្រកួតបានដោយមិនគិតលទ្ធផលឡើយ។ លោក Chan Khun Sing Joseph បានគូសបញ្ជាក់ថា ក្រោយដំណើរការប្រកួតប៉ុន្មានថ្ងៃមកនេះ គណៈកម្មការបច្ចេកទេសកម្ពុជាធ្វើបានយ៉ាងល្អលើការងារបច្ចេកទេស ពោលគឺមានសមត្ថភាពគ្រប់គ្រាន់ដែលអាចរៀបចំការប្រកួតអន្ដរជាតិដោយខ្លួនឯងបាន ប្រកបដោយលក្ខណៈស្ដង់ដារ។ ម្យ៉ាងកម្ពុជាក៏មានធនធានកីឡាករ-កីឡាការិនីមានសមត្ថភាពអាចប្រកួតប្រជែងកម្រិតអន្ដរជាតិផងដែរ។ តាមរយៈនេះ អ្នកជំនាញរៀបចំព្រឹត្តិការណ៍អន្ដរជាតិធំៗដដែលបានវាយតម្លៃ និងកោតសរសើរចំពោះសហព័ន្ធកីឡាទូកក្ដោងកម្ពុជា ទោះបីទើបបង្កើតរយៈពេលខ្លី តែមានសមត្ថភាពគ្រប់គ្រាន់ក្នុងការទទួលរៀបចំការប្រកួតអន្ដរជាតិ។
មិនតែប៉ុណ្ណោះ កម្ពុជាគឺមានទីលានស្ដង់ដារនៃតំបន់ឆ្នេរដ៏ស្រស់ស្អាត ហើយព្រមទាំងរៀបចំទទួលបដិសណ្ឋារកិច្ចចំពោះប្រតិភូ គ្រូបង្វឹក និងកីឡាករ-កីឡាការិនីប្រកបដោយភាពកក់ក្ដៅទៀតផង។ គួរដឹងថា ការប្រកួតកីឡាទូកក្ដោងជើងឯកអាស៊ាននេះមានអត្តពលិក ២៧នាក់មកពី ៣ប្រទេសចូលរួមគឺមានម្ចាស់ផ្ទះកម្ពុជា សិង្ហបុរី (សហម្ចាស់ផ្ទះ) និងម៉ាឡេស៊ីដែលធ្វើការប្រកួតលើ ៥វិញ្ញាសា។ បច្ចុប្បន្នកីឡាករកម្ពុជា ប៉ាល់ សិលា កំពុងធ្វើបានយ៉ាងល្អលើវិញ្ញាសា RS:One ដោយឈរចំណាត់ថ្នាក់លេខ១ ចំនួន ៤ថ្ងៃជាប់គ្នាក្រោយដំណើរការប្រកួតបាន ១១ជុំ ហើយគេបានប្ដេជ្ញានឹងខំប្រឹងបន្ថែមទៀត ដើម្បីឈានទៅដណ្ដើមមេដាយមាសជូនជាតិ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
