លោកប្រធានាធិបតី Donald Trump កាលពីថ្ងៃអាទិត្យ បាននិយាយថា រដ្ឋាភិបាលរបស់លោកមានបំណងកាត់បន្ថយចំនួននិស្សិតបរទេសនៅសាកលវិទ្យាល័យ Harvard និងចង់ឲ្យសាកលវិទ្យាល័យផ្តល់ឈ្មោះនិស្សិតបរទេសទាំងនោះ។

ថ្លែងទៅកាន់អ្នកសារព័ត៌មាននៅអាកាសយានដ្ឋាន Morristown លោក Trump បាននិយាយថា គ្មានរដ្ឋាភិបាលបរទេសណា បរិច្ចាគប្រាក់ដល់សាកលវិទ្យាល័យ Harvard ទេ និងបាននិយាយថា ជំនួយពីរដ្ឋាភិបាលអាមេរិកនឹងត្រូវពិចារណាឡើងវិញ។

រដ្ឋបាលរបស់លោក Trump បានលុបចោលសមត្ថភាពរបស់សាកលវិទ្យាល័យ Harvard ក្នុងការចុះឈ្មោះនិស្សិតបរទេស កាលពីសប្តាហ៍កន្លងទៅនេះ។ ការសម្រេចនេះ បានកត់សម្គាល់ការកើនឡើងនៃយុទ្ធនាការរបស់រដ្ឋបាល លោក Trump ប្រឆាំងសាកលវិទ្យាល័យនេះ។

សាកលវិទ្យាល័យ Harvard បានចាត់ទុកថា ជា «ការបំពានយ៉ាងធ្ងន់ធ្ងរ» លើរដ្ឋធម្មនុញ្ញរបស់សហរដ្ឋអាមេរិក និងច្បាប់សហព័ន្ធផ្សេងទៀត ហើយចៅក្រមអាមេរិក បានរារាំងបណ្ដោះអាសន្ននូវបទបញ្ជារបស់រដ្ឋបាលនេះ។