ទីផ្សារភាគហ៊ុនសកល ជាពិសេសនៅទូទាំងអាស៊ី បានកើនឡើងខ្ពស់នៅថ្ងៃចន្ទ (២៦ ឧសភា) នេះ ហើយប្រាក់អឺរ៉ូ ក៏ហក់ឡើង ប៉ុន្តែសន្ទស្សន៍ហ៊ុនអាមេរិក ធ្លាក់ចុះគួរឱ្យភ្ញាក់ផ្អើល បន្ទាប់ពីលោកប្រធានាធិបតីអាមេរិក Donald Trump បានពន្យារពេលភ្លាមៗរហូតដល់ថ្ងៃទី០៩ ខែកក្កដា នូវការគំរាមកំហែងរបស់លោកក្នុងការដាក់ពន្ធ ៥០% លើទំនិញសហភាពអឺរ៉ុប នៅក្នុងការបន្ធូរបន្ថយបណ្តោះអាសន្នមួយផ្សេងទៀត ដែលជាផ្នែកមួយនៃគោលនយោបាយពាណិជ្ជកម្មមិនទៀងទាត់របស់លោក។

នៅថ្ងៃចន្ទនេះ សន្ទស្សន៍ភាគហ៊ុនអាស៊ីប៉ាស៊ីហ្វិកដ៏ទូលំទូលាយបំផុតរបស់ MSCI នៅខាងក្រៅជប៉ុន បានកើនឡើង ០,១២% ខណៈ Nikkei របស់ជប៉ុន ងើបខ្ពស់ជាងមុនបន្តិច។ ក្នុងចំណោមរូបិយប័ណ្ណនានា ប្រាក់អឺរ៉ូបានឡើងថ្លៃ ០,៣% ដល់ ១,១៣៩៧ដុល្លារក្នុងមួយអឺរ៉ូ ក្នុងកម្រិតខ្ពស់បំផុតចាប់តាំងពីថ្ងៃទី៣០ ខែមេសា មក។

ខណៈទីផ្សារពិភពលោកកំពុងអបអរ ក្រុមហ៊ុន Apple របស់អាមេរិក បានជាប់គាំងក្នុងជម្លោះពាណិជ្ជកម្មកាលពីថ្ងៃសុក្រសប្ដាហ៍មុន បន្ទាប់ពីលោក Trump គំរាមយកពន្ធ ២៥% លើទូរសព្ទ iPhone នាំចូលទាំងអស់ ដែលទិញដោយអ្នកប្រើប្រាស់អាមេរិក។ ជាមួយគ្នានេះ ហ៊ុនរបស់ Nvidia ក៏បានធ្លាក់ចុះជាង ២% នៅឆ្នាំនេះ បន្ទាប់ពីវិនិយោគិនបានភ្ញាក់ផ្អើលពីគំរូ AI របស់ចិន ដែលមានតម្លៃថោក ក្រោយការចេញផ្សាយរបស់ DeepSeek។

ការផ្លាស់ប្តូរគោលនយោបាយចុងក្រោយបំផុតរបស់លោក Trump គឺជាការក្រើនរំលឹកដល់វិនិយោគិនថា កាលៈទេសៈអាចផ្លាស់ប្តូរយ៉ាងឆាប់រហ័ស ហើយអ្នកវិភាគបាននឹងកំពុងចង្អុលបង្ហាញថា វិនិយោគិនកំពុងបង្វែរទិសប្រាក់ចេញពីសហរដ្ឋអាមេរិក ទៅកាន់អឺរ៉ុប និងអាស៊ី ខណៈពួកគេបារម្ភពីលទ្ធភាពនៃវិបត្តិសេដ្ឋកិច្ចរបស់សហរដ្ឋអាមេរិក និងការធ្លាក់ចុះជាសកល៕