ការិយាល័យរបស់ប្រធានាធិបតីទួរគី បានឲ្យដឹងថា លោក Recep Tayyip Erdogan បានជួបនាយករដ្ឋមន្ត្រីប៉ាគីស្ថាន លោក Shehbaz Sharif នៅទីក្រុងអ៊ីស្តង់ប៊ុល (Istanbul) កាលពីថ្ងៃអាទិត្យ (ទី២៥ ខែឧសភា) ហើយបានលើកឡើងថា ប្រទេសទាំង២ នឹងខិតខំជំរុញកិច្ចសហប្រតិបត្តិការ ជាពិសេសក្នុងវិស័យការពារជាតិ ថាមពល និងការដឹកជញ្ជូន។

ទួរគីមានទំនាក់ទំនងយ៉ាងរឹងមាំជាមួយប៉ាគីស្ថាន ដោយប្រទេសទាំង២ មានអ្នកកាន់សាសនាឥស្លាមភាគច្រើនដូចគ្នា និងចែករំលែកទំនាក់ទំនងជាប្រវត្តិសាស្ត្រ ហើយបានបង្ហាញពីសាមគ្គីភាពជាមួយប្រទេសនេះ អំឡុងពេលមានការប៉ះទង្គិចគ្នាជាមួយឥណ្ឌា កាលពីពេលថ្មីៗនេះ។

ការិយាល័យរបស់លោក Erdogan បានឲ្យដឹងថា លោកប្រធានាធិបតីទួរគី បានប្រាប់លោក Sharif ថា វាគឺជាផលប្រយោជន៍របស់ប្រទេសតួកគី និងប៉ាគីស្ថាន ក្នុងការលើកកម្ពស់សាមគ្គីភាព ក្នុងវិស័យអប់រំ ការចែករំលែកព័ត៌មានសម្ងាត់ និងការគាំទ្រផ្នែកបច្ចេកវិទ្យា ដើម្បីប្រយុទ្ធប្រឆាំងនឹងអំពើភេរវកម្ម។

រដ្ឋមន្ត្រីការបរទេសទួរគី លោក Hakan Fidan រដ្ឋមន្ត្រីការពារជាតិ លោក Yasar Guler និងប្រធានទីភ្នាក់ងារចារកម្ម លោក Ibrahim Kalin ក៏បានចូលរួមកិច្ចប្រជុំនេះផងដែរ៕