យោងតាមរបាយការណ៍បានឲ្យដឹងថា ក្រុមហាម៉ាសអត់បានបើកប្រាក់បៀវត្សរ៍ឲ្យយុទ្ធជនរបស់ខ្លួនអស់រយៈពេល ៣ខែមកហើយ ដោយសារការរឹតត្បិតរបស់អ៊ីស្រាអែលលើជំនួយមនុស្សធម៌ និងរារាំងក្រុមមួយនេះ ពីការរឹបអូស និងលក់ការផ្គត់ផ្គង់ជំនួយ ។

ប្រភពព័ត៌មានមួយនៅក្នុងក្រុមភេរវកម្មនេះ និយាយប្រាប់កាសែតអារ៉ាប់ Asharq Al-Awsat ដែលមានមូលដ្ឋាននៅទីក្រុងឡុងដ្រ៍ថា សមាជិកកងពលតូច al-Qassam ដែលជាខ្សែបណ្តាញយោធារបស់ក្រុមហាម៉ាស ពុំទទួលបានការចំណាយណាមួយនោះឡើយ ចាប់តាំងពីខែកុម្ភៈរហូតមក ។

សមាជិកគ្រួសាររបស់ក្រុមភេរវកម្មនេះ ដែលត្រូវបានចាប់ខ្លួន ឬសម្លាប់អំឡុងការប្រយុទ្ធគ្នាជាមួយអ៊ីស្រាអែល ត្រូវបានគេរាយការណ៍ផងដែរថា ពុំទទួលបានប្រាក់ឈ្នូលធម្មតារបស់ពួកគេនោះទេ ។

ក្រុមការងារស៊ីវិលរបស់ក្រុមហាម៉ាស ទទួលបានប្រាក់ខែកាត់បន្ថយនៅសល់ប្រហែល ២៥០ដុលលារប៉ុណ្ណោះ កាលពីរយៈពេល ៤ខែមុន ដែលធ្វើឲ្យមានការអាក់អន់ចិត្តនៅក្នុងចំណោមពួកគេ ហើយគេនៅមិនទាន់ដឹងច្បាស់នោះទេថា ចាប់តាំងពីពេលនោះមក ពួកគេទទួលបានប្រាក់ខែដែរឬទេ ។

ដោយឡែក ថវិកាដែលបានបែងចែកទៅកាន់ក្រសួង និងស្ថាប័នរដ្ឋនៅតំបន់ហ្កាហ្សា ត្រូវបានគេរាយការណ៍ផងដែរថា បានផ្អាកអំឡុងពេលតែមួយនោះ ។

សូមបញ្ជាក់ថា អ៊ីស្រាអែល បានកាត់ផ្តាច់ការផ្គត់ផ្គង់ជំនួយមនុស្សធម៌ទៅកាន់តំបន់ហ្កាហ្សា កាលពីខែមីនា ដោយសារជំនួយមួយចំនួនត្រូវបានក្រុមហាម៉ាសរឹបអូស និងលក់ដើម្បីរកបា្រក់ ។ 

រថយន្តប្រហែល ១០០គ្រឿងត្រូវបានអនុញ្ញាតឲ្យចូលក្នុងតំបន់ហ្កាហ្សាវិញ កាលពីថ្ងៃសុក្រ ប៉ុន្តែនេះមានចំនួនតិចច្រើន ធៀបនឹងរថយន្តប្រហែល ៦០០គ្រឿង ត្រូវបានអនុញ្ញាតឲ្យចូលតំបន់ហ្កាហ្សា មុនខែមីនា ៕