មូលនិធិគាំទ្រដោយសហរដ្ឋអាមេរិក ដែលមានភារកិច្ចផ្គត់ផ្គង់ជំនួយដល់តំបន់ហ្កាហ្សា បាននិយាយថា ខ្លួនបានចាប់ផ្តើមប្រតិបត្តិការកាលពីថ្ងៃចន្ទ (២៦ ឧសភា) សប្ដាហ៍នេះ ដោយដឹកជញ្ជូនស្បៀងអាហារតាមរថយន្តទៅកន្លែងចែកចាយដែលបានកំណត់ បន្ទាប់ពីមានភាពមិនច្បាស់លាស់អំពីថា តើជំនួយបានទៅដល់ជនស៊ីវិលឬទេ។

ផែនការជំនួយ ដែលគាំទ្រដោយអ៊ីស្រាអែល ប៉ុន្តែត្រូវច្រានចោលដោយអង្គការសហប្រជាជាតិនោះ ហាក់ដូចជាកើតឡើងស្របពេលមានការវាយប្រហារយ៉ាងខ្លាំងក្លារបស់អ៊ីស្រាអែល ទៅលើទូទាំងតំបន់ហ៊ុព័ទ្ធដ៏តូចចង្អៀត និងសាលារៀនដែលជនភៀសខ្លួនស្នាក់នៅ បណ្ដាលឱ្យប្រជាជនប៉ាឡេស្ទីនរាប់សិបនាក់បន្តស្លាប់យ៉ាងឃោរឃៅ។

ប្រជាជនប៉ាឡេស្ទីនរាយការណ៍ថា មិនមានសញ្ញានៃការផ្តល់ជំនួយទេនៅព្រឹកថ្ងៃចន្ទ ប៉ុន្តែមូលនិធិមនុស្សធម៌ហ្កាហ្សា ក្រោយមកបានបញ្ជាក់ថា ការចែកចាយដល់ជនស៊ីវិល បានចាប់ផ្តើមហើយ រយៈពេលមួយថ្ងៃបន្ទាប់ពីប្រធានរបស់ទីភ្នាក់ងារនេះចុះចេញពីតំណែងយ៉ាងភ្ញាក់ផ្អើល។

មូលនិធិហ្កាហ្សានោះ បាននិយាយនៅក្នុងសេចក្តីថ្លែងការណ៍មួយថា "រថយន្តដឹកទំនិញបន្ថែមដែលមានជំនួយផ្គត់ផ្គង់ជាច្រើនទៀត នឹងត្រូវចែកចាយនៅថ្ងៃបន្ទាប់ ជាមួយនឹងលំហូរនៃជំនួយកើនឡើងជារៀងរាល់ថ្ងៃ"។ អាជ្ញាធរអ៊ីស្រាអែល កាលពីសប្តាហ៍មុន បានអនុញ្ញាតឱ្យជំនួយចូលទៅក្នុងតំបន់ប៉ាឡេស្ទីននេះជាលើកដំបូងចាប់តាំងពីខែមីនាមក ប៉ុន្តែរថយន្តដឹកទំនិញពីរបីរយគ្រឿងបានដឹកតែស្បៀងអាហារមួយចំណែកតូចដែលត្រូវការប៉ុណ្ណោះ៕