ប្រធានធនាគារកណ្ដាលរបស់សហភាពអឺរ៉ុប ECB លោកស្រី Christine Lagarde បាននិយាយកាលពីថ្ងៃចន្ទ (២៦ ឧសភា) ថា ប្រាក់អឺរ៉ូ អាចក្លាយជាជម្រើសដែលអាចសម្រេចបានជំនួសឱ្យប្រាក់ដុល្លារអាមេរិក ដោយក្លាយជាអត្ថប្រយោជន៍ដ៏ច្រើនសន្ធឹកសន្ធាប់របស់ប្លុក ២០ប្រទេសនេះ ប្រសិនបើរដ្ឋាភិបាលអឺរ៉ុបអាចពង្រឹងស្ថាបត្យកម្មហិរញ្ញវត្ថុ និងសន្តិសុខរបស់ប្លុកបាន។

ដោយបារម្ភចំពោះគោលនយោបាយសេដ្ឋកិច្ចដ៏កម្រោលមិនទៀងទាត់របស់សហរដ្ឋអាមេរិក វិនិយោគិនសកលលោកកំពុងងាកចេញពីទ្រព្យសម្បត្តិប្រាក់ដុល្លារក្នុងពេលប៉ុន្មានខែថ្មីៗនេះ ប៉ុន្តែមនុស្សជាច្រើនបានជ្រើសរើសយកមាសជំនួសវិញ ដោយមិនបានមើលឃើញជម្រើសដោយផ្ទាល់នោះទេ។

តួនាទីសកលរបស់ប្រាក់អឺរ៉ូ បាននៅទ្រឹងអស់ជាច្រើនទសវត្សរ៍មកហើយ ចាប់តាំងពីស្ថាប័នហិរញ្ញវត្ថុរបស់សហភាពអឺរ៉ុប នៅតែមិនទាន់បញ្ចប់កិច្ចការរបស់ខ្លួន ហើយរដ្ឋាភិបាលអឺរ៉ុប បានបង្ហាញពីបំណងតិចតួចណាស់ក្នុងការចាប់ផ្តើមសមាហរណកម្មបន្ថែមទៀត។

លោកស្រី Lagarde បាននិយាយនៅទីក្រុងប៊ែរឡាំងថា "ការផ្លាស់ប្តូរដែលកំពុងបន្ត បានបង្កើតឱកាសសម្រាប់ 'ប្រាក់អឺរ៉ូសកល' ជំនួសឱ្យដុល្លារ ហើយប្រាក់អឺរ៉ូត្រូវតែប្រឹងប្រែងដើម្បីទទួលបានឥទ្ធិពលរបស់ខ្លួន"។ ទេសាភិបាលធនាគារកណ្ដាលអឺរ៉ុបរូបនេះបន្ថែមថា សម្រាប់បញ្ហានេះ អឺរ៉ុបត្រូវការទីផ្សារមូលធនរាវកាន់តែស៊ីជម្រៅ ពង្រឹងមូលដ្ឋានច្បាប់របស់ខ្លួន ហើយត្រូវការពង្រឹងការប្តេជ្ញាចិត្តក្នុងការបើកពាណិជ្ជកម្មជាមួយសមត្ថភាពសន្តិសុខ។

គួរឱ្យដឹងថា តួនាទីរបស់ប្រាក់ដុល្លារបានធ្លាក់ចុះអស់ពេលជាច្រើនឆ្នាំមកហើយ ហើយឥឡូវនេះមានចំនួន ៥៨% ប៉ុណ្ណោះនៃទុនបម្រុងអន្តរជាតិ ដែលជាកម្រិតទាបបំផុតក្នុងពេលជាច្រើនទសវត្សរ៍ ប៉ុន្តែនៅតែល្អបន្តិចលើសពីតួលេខ ២០% របស់ប្រាក់អឺរ៉ូ៕