យោធាឥណ្ឌា និងប៉ាគីស្ថាន បានដាក់ពង្រាយយន្តហោះចម្បាំងលំដាប់ខ្ពស់ មីស៊ីលធម្មតា និងកាំភ្លើងធំ ក្នុងអំឡុងពេលប៉ះទង្គិចគ្នាជាច្រើនទសវត្សរ៍មកហើយ ប៉ុន្តែការប្រយុទ្ធគ្នារយៈពេលបួនថ្ងៃនៅក្នុងខែឧសភា គឺជាលើកទីមួយហើយដែលទីក្រុងញូវដេលី និងទីក្រុងអ៊ីស្លាម៉ាបាដ បានប្រើប្រាស់យានដ្រូន ប្រឆាំងនឹងគ្នាទៅមក ដោយជំហាននេះអាចនាំឱ្យមានការប្រណាំងប្រជែងសព្វាវុធថ្មី។

បទសម្ភាសរបស់សារព័ត៌មានជាមួយមនុស្ស ១៥នាក់ រួមទាំងមន្ត្រីសន្តិសុខ នាយកប្រតិបត្តិឧស្សាហកម្ម និងអ្នកវិភាគក្នុងប្រទេសទាំងពីរ បានបង្ហាញថា ជម្លោះនោះត្រូវបានបញ្ឈប់បន្ទាប់ពីអាមេរិកប្រកាសបទឈប់បាញ់ ប៉ុន្តែមហាអំណាចអាស៊ីខាងត្បូងទាំងពីរ ដែលចំណាយប្រាក់ជាង ៩៦ពាន់លានដុល្លារ លើវិស័យការពារជាតិកាលពីឆ្នាំមុន ឥឡូវនេះបានជាប់ក្នុងការប្រណាំងយានដ្រូនដ៏តានតឹង។

ប្រភពនិយាយថា កំណើនប្រើប្រាស់យានដ្រូនដោយប្រទេសជិតខាងមានអាវុធនុយក្លេអ៊ែរទាំងពីរត្រូវបានរំពឹងទុក ដោយសារតែការវាយប្រហារបែបនេះអាចត្រូវចំគោលដៅ ដោយមិនចាំបាច់មានបុគ្គលិកប្រថុយជីវិត ឬបង្កឱ្យមានកំណើនភាពតានតឹង ដែលមិនអាចគ្រប់គ្រងបាន។

ឥណ្ឌា ក្នុងខែនេះ បានអនុម័តថវិកាទិញគ្រឿងយោធាគ្រាអាសន្នប្រហែល ៤,៦ពាន់លានដុល្លារ ហើយក្រុមមន្ត្រីនិយាយថា យោធាទីក្រុងដេលី គ្រោងនឹងប្រើថវិកាបន្ថែមមួយចំនួនលើការប្រយុទ្ធ និងការឃ្លាំមើលយានដ្រូន។ ជាមួយគ្នានេះ ប្រភពពីប៉ាគីស្ថាននិយាយថា កងកម្លាំងអាកាសរបស់ទីក្រុងអ៊ីស្លាម៉ាបាដ កំពុងជំរុញឱ្យទទួលបានយានដ្រូនន្ថែមទៀត ខណៈខ្លួនព្យាយាមបញ្ចៀសការប្រថុយប្រថានលើការបាត់បង់យន្តហោះកម្រិតខ្ពស់ក្នុងជម្លោះណាមួយ៕