អង់គ្លេស៖ នាយករដ្ឋមន្ត្រីអង់គ្លេសលោក Boris Johnson បានចុះពិនិត្យមជ្ឈមណ្ឌលចាក់វ៉ាក់សាំងបង្ការនៅតំបន់ Kent កាលពីថ្ងៃព្រហស្បតិ៍ ខណៈដែលរដ្ឋាភិបាលបានបន្តកិច្ចខិតខំប្រឹងប្រែងរបស់ខ្លួន ក្នុងការផ្តល់វ៉ាក់សាំងការពារវីរុស COVID-19 ដល់មនុស្សពេញវ័យទាំងអស់នៅចុងខែធ្នូនេះ។
រដ្ឋាភិបាលបាននិយាយថា ក្នុងរយៈពេលប៉ុន្មានថ្ងៃខាងមុខ រដ្ឋាភិបាលនឹងបើកមជ្ឈមណ្ឌលចាក់វ៉ាក់សាំងទ្រង់ទ្រាយធំ នៅតាមពហុកីឡដ្ឋាននានាទូទាំងប្រទេសរួមទាំងពហុកីឡដ្ឋាន Wembley ជាពហុកីឡដ្ឋានបាល់ទាត់ជាតិដែលមានកៅអី ៩០,០០០កន្លែងក្នុងទីក្រុងឡុងដ៍។ ទន្ទឹមនឹងនេះដែរ លោក Johnson កំពុងច្រានចោលការចោទប្រកាន់ថា ការព្រមានរបស់រដ្ឋាភិបាលដែលមានបំណងទប់ស្កាត់វីរុសបម្លែងខ្លួនថ្មី omicron នឹងធ្វើឱ្យចក្រភពអង់គ្លេសដាក់វិធានការបិទខ្ទប់ប្រទេសមួយផ្សេងទៀត។ លោក Johnson បានទទូចកាលពីថ្ងៃព្រហស្បតិ៍ថា ទោះបីជាមានការព្រួយបារម្ភអំពីការរាលដាលឆាប់រហ័សនៃវីរុសបម្លែងថ្មីក៏ដោយ ស្ថានភាពនៅក្នុងចក្រភពអង់គ្លេសគឺខុសពីឆ្នាំមុន ដោយសារការពង្រីកកម្មវិធីចាក់វ៉ាក់សាំង និងការធ្វើតេស្តវីរុស។
ប្រធានផ្នែកវេជ្ជសាស្ត្ររបស់ប្រទេសអង់គ្លេសបានព្រមានថា ស្ថានភាពទំនងជាកាន់តែធ្ងន់ធ្ងរ ខណៈវីរុសបម្លែងខ្លួនថ្មី omicron ជំរុញឱ្យមានរលកថ្មីនៃជំងឺក្នុងអំឡុងពេលបុណ្យណូអែល។ ទន្ទឹមនឹងនេះដែរ ប្រទេសបារាំងបានប្រកាសថា ប្រទេសនេះនឹងរឹតបន្តឹងការមកដល់ពីចក្រភពអង់គ្លេស ដោយសារតែករណីរាលដាលវីរុសឆាប់រហ័សនៃវីរុសបម្លែងខ្លួនថ្មី omicron។ អ្នកនាំពាក្យរដ្ឋាភិបាលនិយាយថា ប្រទេសបារាំងនឹងដាក់វិធានការរឹតត្បិតកំណត់លើហេតុផលសម្រាប់ការធ្វើដំណើរ និងតម្រូវការថ្មីនៃការធ្វើចត្តាឡីស័ករយៈពេល ៤៨ម៉ោងនៅពេលមកដល់។ វិធានការថ្មីនេះនឹងចូលជាធរមាននៅថ្ងៃសៅរ៍៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
