ប្រធានាធិបតីអ៊ុយក្រែន លោក Volodymyr Zelenskiy បានព្រមានថា មាន "ភស្តុតាងគ្រប់គ្រាន់" ដែលបង្ហាញថា រុស្ស៊ីកំពុងរៀបចំការវាយលុកថ្មីនៅអ៊ុយក្រែន ខណៈកិច្ចចរចាសន្តិភាពសម្របសម្រួលដោយទីក្រុងវ៉ាស៊ីនតោន ទទួលបានលទ្ធផលតិចតួច ហើយលោកប្រធានាធិបតីអាមេរិក Donald Trump បានរិះគន់យ៉ាងខ្លាំងចំពោះការវាយប្រហារតាមអាកាសរបស់ទីក្រុងមូស្គូ កាលពីចុងសប្តាហ៍។

ទីក្រុងគីវ បានព្រមានក្នុងប៉ុន្មានខែថ្មីៗនេះថា កងទ័ពរុស្ស៊ីកំពុងបង្កើនការវាយរុញថ្មីៗក្នុងប្រទេសដើម្បីពង្រឹងជំហរចរចារបស់ខ្លួន។ ក្រុមមន្ត្រីអ៊ុយក្រែនក៏រាយការណ៍អំពីកិច្ចប្រឹងប្រែងយោធាថ្មីរបស់រុស្ស៊ី នៅភាគឦសាននៃតំបន់ Kharkiv និងតំបន់ Sumy របស់អ៊ុយក្រែនផងដែរ។

លោក Zelensky បាននិយាយក្នុងសុន្ទរកថាពេលល្ងាចរបស់លោក កាលពីថ្ងៃចន្ទ (២៦ ឧសភា) សប្ដាហ៍នេះថា មាន "ភស្តុតាងគ្រប់គ្រាន់" ថាទីក្រុងមូស្គូ កំពុង "រៀបចំប្រតិបត្តិការវាយរុញថ្មី ហើយរុស្ស៊ី កំពុងចង់ឱ្យសង្រ្គាមបន្តអូសបន្លាយ"។ លោក Jack Watling អ្នកស្រាវជ្រាវជាន់ខ្ពស់នៃវិទ្យាស្ថានចក្រភពអង់គ្លេស បាននិយាយនៅដើមខែនេះថា មានសញ្ញាដែលថារុស្ស៊ី បានចាប់ផ្តើមការវាយលុកនៅរដូវក្តៅរួចទៅហើយ ដោយបង្កើនការវាយសន្ធាប់ជាលំដាប់នៅភាគខាងកើតអ៊ុយក្រែន។

ក្រុមអ្នកវិភាគនិយាយថា រុស្ស៊ីទំនងជាមិនមានធនធានដើម្បីធ្វើការវាយលុកទ្រង់ទ្រាយធំនៅចំណុចជាច្រើនតាមជួរមុខរាប់រយគីឡូម៉ែត្រក្នុងរដូវក្តៅនេះទេ ប៉ុន្តែអាចផ្តោតលើកងទាហាន និងគ្រឿងយុទ្ធោបករណ៍បន្ថែមទៀតនៅចំណុចជាក់លាក់ណាមួយ ដើម្បីធ្វើឱ្យប្រព័ន្ធការពាររបស់អ៊ុយក្រែន បន្តស្ថិតនៅក្រោមសម្ពាធ៕