បើតាមការប៉ាន់ប្រមាណពីក្រុមហ៊ុនវិភាគទីផ្សារបច្ចេកវិទ្យាមួយ បង្ហាញថា ការនាំចេញទូរសព្ទ iPhone ពីប្រទេសឥណ្ឌាទៅកាន់សហរដ្ឋអាមេរិក បានកើនឡើង ៧៦ភាគរយ ក្នុងខែមេសា បើធៀបនឹងរយៈពេលដូចគ្នា។ ការកើនឡើងនេះកើតមានក្នុងពេលដែលក្រុមហ៊ុន Apple ពន្លឿនផែនការ «ផលិតនៅក្នុងប្រទេសឥណ្ឌា» របស់ខ្លួន ដែលអ្នកវិភាគលើកឡើងថា នឹងត្រូវជួបជាមួយវិធានការទប់ស្កាត់ពីប្រធានាធិបតី លោក Donald Trump និងទីក្រុងប៉េកាំង។

ទិន្នន័យពីស្ថាប័ន Canalys ដែលពេលនេះជាផ្នែកមួយនៃក្រុមហ៊ុន Omdia បានបង្ហាញថា ទូរសព្ទ iPhone របស់សហរដ្ឋអាមេរិក ដែលត្រូវបានដឹកជញ្ជូនពីឥណ្ឌា ក្នុងខែមេសា ឡើងដល់ចំនួនប្រហែល ៣.០០០.០០០គ្រឿង។ ចំនួននោះគឺជាផ្ទុយស្រឡះពីការនាំចេញពីប្រទេសចិន ក្នុងរយៈពេលដូចគ្នា ដែលបានធ្លាក់ចុះប្រហែល ៧៦ភាគរយ ធៀបនឹងឆ្នាំមុន ដោយមកនៅត្រឹមតែ ៩០០.០០០គ្រឿងប៉ុណ្ណោះ។

យោងតាមអ្នកគ្រប់គ្រងផ្នែកស្រាវជ្រាវនៅក្រុមហ៊ុន Omdia (លោក Le Xuan Chiew) បានឲ្យដឹងថា តួលេខខែមេសា បង្ហាញពីវិធានការខ្លាំងក្លាដែលក្រុមហ៊ុន Apple បានអនុវត្ត ដើម្បីសម្របទៅនឹងការដំឡើងពន្ធរបស់ទីក្រុងវ៉ាស៊ីនតោនលើប្រទេសចិន ជាទីដែលក្រុមហ៊ុម Apple ផលិតទូរសព្ទ iPhone ភាគច្រើនរបស់ខ្លួន។

បើយោងតាមការប៉ាន់ប្រមាណរបស់ក្រុមហ៊ុន Omdia បានឲ្យដឹងថា ឥណ្ឌាក៏បានវ៉ាដាច់ប្រទេសចិនផងដែរ ក្នុងការនាំចេញ iPhone ទៅកាន់សហរដ្ឋអាមេរិក ក្នុងខែមីនា។ ការកើនឡើងនេះ បានកើតឡើងមុនការអះអាងដំបូងរបស់លោក Trump នូវការដាក់ចេញ «ពន្ធបដិការ» កាលពីថ្ងៃទី២ ខែមេសា។ ហើយបើយោងតាមលោក Chiew បានឲ្យដឹងថា បរិមាណនៃការដឹកជញ្ជូននៅក្នុងខែនោះ គឺខ្ពស់ខុសធម្មតា ហើយហាក់ដូចជាដោយសារតែការស្តុករបស់ក្រុមហ៊ុន៕