ប្រមុខកម្មវិធីនុយក្លេអ៊ែរអ៊ីរ៉ង់ គឺលោក Mohammad Eslami នៅថ្ងៃពុធ (ទី២៨ ខែឧសភា)នេះ បាននិយាយថា ប្រទេសអ៊ីរ៉ង់អាចនឹងអនុញ្ញាតឲ្យក្រុមឃ្លាំមើលបរមាណូរបស់អង្គការសហប្រជាជាតិបញ្ជូនអ្នកត្រួតពិនិត្យអាមេរិកទៅកាន់ទីតាំងរបស់អ៊ីរ៉ង់ ប្រសិនបើកិច្ចពិភាក្សារបស់ទីក្រុងតេអេរ៉ង់ជាមួយទីក្រុងវ៉ាស៊ីនតោនទទួលបានជោគជ័យ។

ទីក្រុងតេអេរ៉ង់ និងវ៉ាស៊ីនតោន ត្រូវបានគេរំពឹងថា នឹងបើកកិច្ចចរចាជុំទី៦ ដើម្បីដោះស្រាយវិវាទដ៏យូរអង្វែង ជុំវិញកម្មវិធីនុយក្លេអ៊ែររបស់អ៊ីរ៉ង់ ដោយប្រធានាធិបតីសហរដ្ឋអាមេរិក លោក Donald Trump បានរំពឹងពីការទទួលបាន «ដំណឹងល្អ»។

លោក Eslami បានប្រាប់សន្និសីទសារព័ត៌មានក្នុងទីក្រុងតេអេរ៉ង់ថា៖ «វាជារឿងធម្មតាទេដែលមន្ត្រីអធិការកិច្ចមកពីប្រទេសអរិភាពមិនត្រូវបានអនុញ្ញាតឲ្យមាន ប៉ុន្តែប្រសិនបើកិច្ចព្រមព្រៀងនុយក្លេអ៊ែរត្រូវបានឈានដល់ យើងអាចអនុញ្ញាតឲ្យអ្នកត្រួតពិនិត្យអាមេរិកដែលធ្វើការឲ្យទីភ្នាក់ងារថាមពលបរមាណូអន្តរជាតិ (IAEA) ចូលមើលទីតាំងនុយក្លេអ៊ែររបស់យើង»។

គួរបញ្ជាក់ថា ប្រទេសទាំង២ បានខ្វែងគំនិតគ្នា ជុំវិញបញ្ហាការចម្រាញ់សារធាតុអ៊ុយរ៉ាញ៉ូម នៅប្រទេសអ៊ីរ៉ង់ ដែលទីក្រុងវ៉ាស៊ីនតោនលើកឡើងថា ជាផ្លូវដែលអាចឆ្ពោះទៅរកការផលិតអាវុធនុយក្លេអ៊ែរ ហើយត្រូវតែបញ្ឈប់កុំឲ្យមានសូម្បីបន្តិចបន្តួច។ ទីក្រុងតេអេរ៉ង់អះអាងថា កម្មវិធីនុយក្លេអ៊ែររបស់ខ្លួន គឺសម្រាប់តែគោលបំណងស៊ីវិលប៉ុណ្ណោះ ហើយចាត់ទុកការងារចម្រាញ់របស់ខ្លួនជាបន្ទាត់ក្រហម។

លោក Eslami បានសង្កត់ធ្ងន់ថា៖ «ការចម្រាញ់គឺជាមូលដ្ឋានគ្រឹះ និងសសរស្តម្ភនៃឧស្សាហកម្មនុយក្លេអ៊ែររបស់ប្រទេស។ វាហាក់ដូចជានរណាម្នាក់ត្រូវបានអនុញ្ញាតឲ្យមានស្ថានីយ និងបណ្តាញអគ្គិសនី ប៉ុន្តែមិនត្រូវបានអនុញ្ញាតឲ្យបង្កើតរោងចក្រថាមពល»៕