ស្ពានត្រូវបានបំផ្លាញ ចរន្តអគ្គិសនីត្រូវបានកាត់ផ្ដាច់ ស្ថានីយទឹកមិនដំណើរការ ហើយមានការលួច នៅមន្ទីរពេទ្យ ដែលទាំងអស់នេះ មានន័យថា នៅទូទាំងប្រទេសស៊ូដង់ ផលប៉ះពាល់ដ៏បំផ្លិចបំផ្លាញ លើហេដ្ឋារចនាសម្ព័ន្ធនានា ដោយសារសង្គ្រាមស៊ីវិលរយៈពេល ២ឆ្នាំ បានធ្វើឲ្យគ្រប់យ៉ាងជាប់គាំងទាំងអស់។

ជម្លោះ រវាងកងទ័ពស៊ូដង់ និងកងកម្លាំងគាំទ្ររហ័សយោធាប៉ារ៉ា (RSF) បានសម្លាប់ និងបណ្ដាលឲ្យមានរបួសដល់មនុស្សរាប់ម៉ឺននាក់។ ហើយជម្លោះនេះ ក៏បានកាត់ផ្តាច់ផងដែរនូវប្រព័ន្ធគ្រប់យ៉ាងដែលសង្គមបានបង្កើតឡើង។ អាជ្ញាធរស៊ូដង់ប៉ាន់ប្រមាណតម្លៃនៃការកសាងហេដ្ឋារចនាសម្ព័ន្ធឡើងវិញរាប់រយពាន់លានដុល្លារ។

នៅរដ្ឋធានី Khartoum អ្នកស្រុកបានស៊ូទ្រាំនឹងការដាច់ចរន្តអគ្គិសនីរយៈពេលជាច្រើនសប្តាហ៍ ប្រើប្រាស់ទឹកមិនស្អាត និងមន្ទីរពេទ្យចង្អៀតដោយអ្នកជំងឺ។ អ្នកនាំពាក្យរបស់រដ្ឋ Khartoum បានឲ្យដឹងថា ស្ថានីយ៍ទឹកសំខាន់ចំនួន ២ របស់រដ្ឋធានី បានផ្អាកដំណើរការនៅដើមដំបូងនៃសង្រ្គាម ខណៈដែលទាហាន RSF បានលួចម៉ាស៊ីន និងប្រើប្រាស់ប្រេងឥន្ធនៈចាក់រថយន្ត។

អាជ្ញាធរស៊ូដង់ប៉ាន់ប្រមាណថា ត្រូវការទឹកប្រាក់កសាងឡើងវិញចំនួន ៣០០ពាន់លានដុល្លារ សម្រាប់ទីក្រុង Khartoum និង ៧០០ពាន់លានដុល្លារ សម្រាប់តំបន់ផ្សេងទៀតរបស់ប្រទេស។ នោះគឺជាអ្វីដែលក្រុមផ្តល់ជំនួយហៅថា វិបត្តិមនុស្សធម៌ដ៏អាក្រក់បំផុតរបស់ពិភពលោក ដោយមនុស្សប្រហែល ១៣លាននាក់បានភៀសខ្លួនចេញពីផ្ទះសម្បែងរបស់ពួកគេ។

ប៉ុន្តែបន្ទាប់ពីកងកម្លាំងរដ្ឋាភិបាលដណ្តើមកាន់កាប់ទីក្រុង Khartoum ក្នុងឆ្នាំនេះ មនុស្សមួយចំនួន កំពុងចាប់ផ្តើមវិលត្រលប់ទៅកាន់រដ្ឋធានីនេះវិញ។ លោក Luca Renda នៃកម្មវិធីអភិវឌ្ឍន៍របស់អង្គការសហប្រជាជាតិ ប្រាប់ថា ការដោះស្រាយបញ្ហាខ្វះខាតហេដ្ឋារចនាសម្ព័ន្ធ គឺមានភាពបន្ទាន់ដែលត្រូវសម្រេចឲ្យបានលឿនបំផុត៕